Bandièra01 1180x150: Comuna de Tolosa

Actualitats

Soçairac: an partejat nòstra lenga e l’an fach viure un moment

Lo 19 de març passat, Aquí l’Òc organizèt una animacion occitana memorabla

Estève Clerc plan enrodat a Soçairac
Estève Clerc plan enrodat a Soçairac
Dimenge 19 de març, a Soçairac (Segalar Carcinòl), dins la sala La grange, s’es debanat un après-miègjorn d’animacion amb cançons, contes e istòrias en occitan e en francés organizat pels adultes dels corses d’occitan de l’associacion Aquí l’Òc de Sent Seren.
 
Una cinquantena de personas venguèt per partejar nòstra lenga, la far viure un moment ensemble. Las personas de la corala del país de Soçairac an cantat amb nosautres: Chas la maire Antoèna, L’aiga de ròsa, Ai vist lo lop, Turlututú
 
Remerciam los cantaires d’aver ajustadas lors cançons a las nòstras. Los espectators que coneissián l’occitan se regalèron d’escotar las istòrias: Estève Clerc diguèt Per tretze sòus, Breiçairòla per la nena e Lo caval de la Calquièira. Miquèl Rougié contèt cossí far l’òli de noses e quant còsta l’òli. Maria-Aimada Veaux contèt la mesaventura de Raimond amb los gendarmas. Cantèrem los cants Lo meu país del grop La Talvera mas tanben la cançon de Nadau L’immortèla. Miquèl Marchand legiguèt un conte de Marcèu Esquieu, L’innocent del vilatge. Maria-Nadala Rougié nos regalèt amb una istòria d’Albèrta Forestièr, La vielhòta e lo perdigal. Elia Delbos nos contèt doas istòrias plan amusantas. Enfin, una dama del país recitèt un poèma, L’espalhonada d’Albèrt Lacomba, qu’èra regent a Prudomat, e una bona istòria en francés.
 
Tot lo monde se faguèt plaser de cantar lo Se canta e l’après-miègjorn s’acabèt per un veire de l’amistat ofèrt per la municipalitat de Soçairac en Carcin. Un grand mercé a aquela comuna representada per Arlette Rodriguez, l’adjunta al cònse cargada de la cultura.
 
 
Eveniments que venon
 
L’associacion Aquí l’Òc vos dona rendètz-vos pel mes d’abrial amb al programa seguent:
 
— Divendres 7 d’abrial: obrador de discussion de 18h a 19h a l’Espaci Occitan Carcinòl, a Sent Seren, amb per tèma los aucèls migrators.
 
— Dijòus 20 d’abrial: obrador de danças tradicionalas de 20h a 22h a l’Espaci Occitan Carcinòl, a Sent Seren amb Baptiste Delaunay e de musicians.
 
— Dissabte 22 d’abrial, de 17h a 23h, a l’Espaci Occitan Carcinòl a Sent Seren: omenatge a Marcela Delpastre.
 
17h: conferéncia e lecturas sus aquela escrivana, poèta e agricultritz amb Dominique Decomps e Patrick Cazals.
 
19h: repais sus reservacion.
 
21h: projeccion dels filmes Marcelle, parole e Marcelle Delpastre, à fleur de vie de Patrick Cazals, presentats e comentats per Dominique Decomps e lo cineasta. Organizacion: Les Films du Horla e les Films du Genièvre en partenariat amb l’associacion Aquí l’Òc.
 
Una mòstra en francés serà tanben presenta a l’Espaci Occitan Carcinòl del 18 d’abrial al 21 de mai. Relata, en 14 panèus, la vida e l’òbra de Marcela Delpastre.
 
— Dissabte 29 e dimenge 30 d’abrial: taulièr de libres e de produches culturals occitans a l’ocasion del concèrt balèti amb Du Bartàs e Brotto-Lopez a Banhac, e de la jornada del libre a Teissiu.
 
— E plan segur, del 19 al 21 de mai: lo Festenal Escambis a Sent Seren e Sent Joan de la Ginèsta.
 
Per mai d’informacions, podètz telefonar al +33(0)6 73 62 64 63 o escriure a aqui.loc(a)laposte.net.
 
 
 
 
Maria-Aimada Veaux
 
 
 
 
 


abonar los amics de Jornalet


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article