Bandièra01 1180x150: Comuna de Tolosa

Actualitats

Espanha: un an de preson per s'èsser trufat de l’èx-president franquista Luis Carrero Blanco

Cassandra Vera publiquèt sus Twitter tretze badinadas que se risián del militar e politician de la dictatura assassinat per ÈTA. La condemnan pel delicte d’umiliacion a las victimas del terrorisme

La justícia espanhòla a condemnat a un an de preson Cassandra Vera Paz, una jove twittaira que publiquèt sul ret social qualques badinadas sul president del govèrn espanhòl franquista Luis Carrero Blanco, assassinat per ÈTA en 1973. Cassandra Vera l’a jutjada l’Audiéncia nacionala espanhòla, un tribunal d’excepcion que tòca los delictes restacats amb lo terrorisme, e l’a condemnada pel delicte d’umiliacion a las victimas del terrorisme en tot considerar que sos messatges son un “mesprètz, desonor e trufa” per una persona qu’a patit un “atac terrorista”.
 
Segon la justícia espanhòla, de frasas coma “Henry Kissinger donèt a Carrero Blanco un tròç de la Luna e ETA li paguèt lo viatge enlai” o “Spiderman vs. Carrero Blanco” acompanhadas d’imatges, refortisson, al vejaire d’aquel tribunal, “lo caractèr de descrida, trufa e mocariá a l'esgard d'una victima del terrorisme, una plaga que persistís”.
 
La senténcia es enòrmament dura se prenèm en compte que tre ara Cassandra Vera poirà pas recebre cap d’ajuda sociala, mai que mai de borsas d’estudis. En mai d’aquò, es ela que deu pagar los fraisses de justícia. Mas ela es estudianta e sos parents son al caumatge e encaisson sonque 421 èuros per mes, çò ditz una campanha que culhís d’argent sus PayPal per l’ajudar.
 
Luis Carrero Blanco foguèt un militar espanhòl qu’atenguèt lo reng d’amiral. Èra lo braç drech del dictator Francisco Franco que lo nomenèt en 1973 president de son govèrn. Èra un catolic afogat e se consagrèt a la critica del comunisme e de la francmaçonariá dins d'escriches publicats amb l’escaisnom de Juan de la Cosa. Foguèt tuat per ÈTA qualques meses après sa nominacion dins un atemptat que faguèt sautar sa veitura per dessús una nauta bastissa.
 
 
Reaccion sus Twitter
 
Los usatgièrs de Twitter an reagit sul pic en aprene la senténcia. De milièrs de twittaires publican ara de galejadas sus l’èx-cap del govèrn espanhòl franquista e desfisan atal una senténcia que considèran coma injusta. Podètz veire las etiquetas #YoSoyCasandra e #CarreroBlanco.
 
 

abonar los amics de Jornalet




​​​​​​​

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Antonin
11.

Seriá interessant de saber qual es lo planhent. Foguèsse la familha de Carrero Blanco qu'agès facha la denóncia, la plancha seriá legitima.

  • 7
  • 0
Francesc Palma
10.

Internet es pas de cap estat. Han cap de jurisdiccion per poder posar sancions.

  • 2
  • 0
Pom Pom Pom Pidou Bedariu
9.

Carrero Blanco victima del terrorism ? Quina marrida fe de la justicia espanhola d'ausar botar sul mèsma plan aquel Carrero Blanco amb los tuats dels atemptats islamics de Madrid o del Bataclan !
Alara aquel paure òme auria patit un “atac terrorista” ? E quantas victimas faguèt patir a bodre, aquel companh de tuaria de Franco, del temps de la guèrra d'Espanha e de la dictatura ? Valent a dire que lo penjament del Mussolini (quantes tipes faguèt penjar o maselar aquel ?) per de maquisards italians podria èsser comparat amb los sagatatges e las escoteladas de Daesh ?
La condemnacion fantasierosa de la Cassandra Vera Paz a tot d'un sinistra peis d'abril. Es tras qu'espantant de veire aquela recalivada del fascism dins l'Espanha d'uèi. A quand al nòstre una condemnacion del cantaïre Mans de Breish per sa cançon "O Sant Loïs" (sus prepausicion de Marine/Fillon/Asselineau/Mélenchon/Valls ?) per insolentament grèu de la civilisacion francèsa e incitacion a l'òdi racial e religios ? Galejada ? De sègre...

  • 14
  • 0
E Passa Que T Ai Vist Lo Clapàs (Montpelhièr)
8.

Carrero Blanco èra considerat pel Franco coma lo seu successor natural, son "dauphin" coma se ditz en francès monarquic, aquel que devia manténer e perseguir lo poder fascist en Espanha aprèp la mòrt dau dictator.Un pauc, per parlar als mai joves legeires dau Jornalet, coma en Siria lo Bachar El Hassad qu'a succedit a son paire dictator, l'Hafez El Hassad.
Tot èra previst al nivèl de las institucions estatalas per aquela passassion de poder e la subrevida dau fascism espanhòl. Lo vièlh Franco (qu'avia pas pus que dos ans a viure) podia se'n anar tranquilèt, l'ostal seria plan gardat... Levat qu'en tuant Carrero Blanco, ETA a decapitat sul pic aquel esper de succession. Aquel escrancament dels plans a grandament facilitat lo desvariment dau poder estatal fascist, tre lo Franco enterrat, e permes l'espeliment de la democracia en Espanha. Espeliment qu'auria pas pogut se far se lo Carrero Blanco avia succedit "normalament" al vièlh dictator.
Es doncas a ETA que la democracia espanhola dèu son existència, es quicòm qu'òm a tendencia a doblidar. E es quicòm que la democracia espanhola prefèra amagar o doblidar. Sens la mòrt dau Carrero Blanco, lo fascism seria segurament demorat en Espanha una o doas decenias de mai, e òc.

  • 15
  • 2
ltrobat Gasconha
7.

#1 N'as pas briga comprés. Lo Fillon qu'ei un candidat antisistèma. Qu'ei eth medish qu'at a dit!

  • 0
  • 0

Escriu un comentari sus aqueste article