Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'AranPujòlo

Val d’Aran: arriba la 7a edicion del Festenal Pyrenades

Lo festenal aranés del pirineïsme se debanarà a Salardú de l’8 al 15 d’abril

Coma cada an a l’entorn de Pascas, torna Pyrenades, lo festenal aranés del pirineïsme, qu’ongan se debanarà de l’8 al 15 d’abril, sempre a Salardú. Lo festenal prepausa de passejadas, de conferéncias, de concèrts, de cinèma e d’animacions pels enfants.
 
Es ja lo seten an que lo Musèu del Pirineïsme prepausa aqueste festenal, qu’ongan presenta un programa vast ont cal soslinhar la 7a Mòstra de Cinèma de Montanha, amb la projeccion d’un filme cada ser sus la vida en montanha; lo darrièr ne serà lo documentari entitolat Aguestes montanhes-Istòries de Baquèira, sus l’istòria de l’estacion d’esquí aranesa.
 
En mai d’aquò, las animacions infantilas se son alargadas mai que mai amb un cors d’escalada per enfants e d’obradors d’argela, de pintura, de reconeissença d’ausèls e de piadas d’animals.
 
 
Caminar, sentir e escriure
 
“Caminar, sentir e escriure”: es aital qu’Henri Beraldi definiguèt lo concèpte de pirineïsme. Los pirineïstas èran los que favoriguèron la naissença del torisme en aquelas montanhas amb un esperit aventurièr, naturalista e umanista. Mas l’edicion d’ongan de Pyrenades cèrca d’imaginar cossí seràn los Pirenèus long del sègle XXI, e atal prepausa de dialògs amb d’expèrts alpinistas e pirineïstas, de guidas de montanha, de geografes....
 
Los debats se poiràn seguir suls rets socials, amb las etiquetas #Pyrenades e #PirineismeSXXI.
 
Coma novetat d’ongan, totas las conferéncias del festenal se poiràn seguir en dirècte pel canal de YouTube de Pyrenades e se poirà participar al debat mejançant los eveniments que se son creats sus Facebook. Atal las jornadas seràn mai participativas e arribaràn a totas las personas interessadas.

 
 
 
 


abonar los amics de Jornalet
 




 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma
1.

Es una causa que se podi hi anirai qualque pic a a veire Aran.

  • 1
  • 0

Escriu un comentari sus aqueste article