Lo temps de Pascas es fait pel mond fòrt dins lo domeni tretzista: quatre partidas de jogar en quinze jorns en Superliga e en Championship. En Elèit 1, dimenge, se jogarà la darnièra jornada de las partidas anar-tornar abans la Dimenjada magica de la fin del mes a Carcassona e las fasas finalas de la Copa e del campionat.

Dragons: lo retorn de Gigòt
 
Bona novèla en mitan de setmana pels Dragons: la requalificacion de l’arrièr Tòni Gigòt en apèl davant la Comission Antidopatge de la Federacion: tres meses fermes en plaça de dos ans. Divendres, l’arrièr poguèt jogar e marcar jol malhòt sang e aur a Leigh ont los catalans tornèron trapar lo sorire de la victòria: 37-26. Enfin, un sorire demesit per las nafraduras de Jason Baitieri e Luke Burgess alara que cal jogar contra los Gigants d’Huddersfield tre aqueste dimècres e esperar la venguda de Salforddiluns a Brutus.
 
Dijòus, Morgan Escarré marquèt totes los punts de Wigan: dos ensages e una transformacion, mas lo campion pleguèt sus sa pelena fàcia al cap de fila Castleford: 10-27.
 
Divendres, St Helens e Huddersfield se quitèron sus una egalitat 14-14. Warrington signèt sa primièra victòria de la sason fàcia a Leeds: 25-14. Wakefield dominèt Widnes 30-4 e Salford cartonèt a Hull: 54-18.
 
En Championship, lo Tolosa Olimpic s’installa en segonda posicion en batent largament Oldham 58-18 abans de jogar a Londres divendres a miègjorn e de reçaupre los primièrs d’Hull-KR lo diluns de Pascas a Blanhac.
 
 
Elèit 1: Lesinhan balha la leiçon a Limós
 
En Elèit 1, los dos primièrs s’afrontavan dimenge sus la pelena de l’Agulha. Mas los singlars de Corbièras faguèron pas las causas a mièjas: 34-8 a la pausa, 54-24 al final. Limós aviá l’esperit embrumat coma un lendeman de Tòcas e Cloquièrs!
 
Dissabte, Carcassona se faguèt susprene pel vam e l’esperit d’iniciativa albigés: victòria d’Albi: 31-22 e Avinhon gardèt tres punts d’avança suls Dragonets: 19-16. Los Bròncos de Tolosa ganhèron enfin una partida: 44-14 contra Palau. Dimenge, St Gaudenç anèt ganhar justet a Vilanòva: 26-24.
 
Per la dimenjada de Pascas, se jogarà la jornada remesa de genièr aprèp la modifiacion del calendièr:
 
— dissabte, 4 partidas seràn al programa: Avinhon-Limós, Vilanòva-Lesinhan, Tolosa-St Gaudenç e Albi-Dragonets. Dimenge, en país catalan, Palau-Carcassona clavarà la tièra.
 
Se sap tanben las partidas per la Dimenjada Magica de la fin del mes a Carcassona, ont la Federacion experimentarà, a l’imatge australian, l’arbitratge de dos:
 
— lo dissabte 29, se tendràn Vilanòva-St Gaudenç, Albi-Avinhon e Lesinhan-Limós e lo dimenge 30: Palau-Tolosa e Carcassona-Dragonets, sens doblidar lo sopar del dissabte de ser dobèrt a totes los tretzistas.
 
 
NRL: primièra desfaita per la Tempèsta
 
En NRL, la Tempèsta de Melbourne coneis sus sa pelena sa primièra desfaita de la sason fàcia a las Làmias de Cronulla: 2-11 e daissa la primièra plaça al classament als Dragons de St George Ilawara, que son anats batre Manly 35-10.
 
 
 
 
Alan Roch