Actualitats
Ara fa 5 ans. Jean-Luc Mélenchon, la vièlha esquèrra
Jornalet prepausava, cada jorn a partir del diluns 16 fins al dissabte 21 d'abril de 2012, una analisi dels programas electorals dels sièis candidats mai importants a las eleccions presidencialas francesas de fa cinc ans.
Jean-Luc Mélenchon, candidat del Front d'Esquèrra, es segurament lo candidat revelacion d'aquestas eleccions presidencialas. D'origina socialista, Mélenchon a capitat de bastir una candidatura qu'a amassat un molon de gents al long de tota la campanha electorala. En Occitània, cal remarcar las mai de 30 000 personas qu'assistiguèron al seu meeting de 5 d'abril sus la Plaça del Capitòli de Tolosa. Ara, Jornalet vos prepausa d'analisar un pauc mai prigondament lo seu programa electoral, que la primièra remarca que ne podèm far quand lo legissèm es que s'agís d'un programa plan ideologic. Dins lo programa i trobam mai de reflexion politica e sociala que non pas de proposicions concrètas sul terren. Anem.
SMIC a 1700€ e 35 oras
Lo Front d'Esquèrra sap qu'un dels punts mai atractius del seu programa electoral es la defensa de las classas popularas e obrièras. Amb un discors de tendéncia marxista, Mélenchon a passat la campanha a prometre un fum de cambiaments de tipe social. Una de las proposicions mai repetidas es de far passar l'SMIC a 1700€, aital coma la proposicion de recuperar l'esséncia de las 35 oras setmanalas. Aquestas proposicions se veson acompanhadas per un fòrt discors contra la banca privada, e en favor de las nacionalizacions. Per contra, en legissent lo programa, es vertadièrament complicat de saber cossí Mélenchon e lo Front d'Esquèrra pensan desvolopar aquestas politicas enmièg de la crisi globala. Qual es lo que pagarà la fèsta? Aquò's quicòm que lo programa del FE explica pas.
Una VI Republica parlamentària: lo retorn de la proporcionala
Lo Front d'Esquèrra s'engatja per encetar una assemblea constituenta, que deurà cambiar la constitucion e instaurar la VI Republica en França, que serà parlamentària e non pas presidencialista. En mai d'aquò, Mélenchon s'engatja per restablir la proporcionala a totas las eleccions, quicòm que seriá plan interessant per totes los partits levat lo Partit Socialista e l'UMP, pr'amor que balhariá mai de poder als partit pichòts, qu'actualament veson redusida lor representacion.
Non a la reforma territoriala... mas non al federalisme
Mélenchon s'es engatjat per arrestar la reforma territoriala, aprovada per Sarkozy en 2010, e que fusionarà los departaments e las regions, redusirà lor poder, e crearà de grandas metropòlis, coma París, Lion, Marselha o Tolosa. Ça que la, lo Front d'Esquèrra es pas brica d'acòrd amb una reforma de la constitucion de caractèr federal. Al contrari, eles penson que sonque un estat fort e centralizat podrà garantir l'egalitat de dreits entre totes los franceses. Aital, dins lo seu programa, i podèm trobar de frasas que fan pensar a una cèrta paur a la descentralizacion, coma "refusarem la mesa en concurréncia dels territòris", o "lo principi general de responsabilitat que l'Estat es lo garant dels ciutadans sus l'ensems del territòri deurà èsser reafirmat e consolidat".
Lengas e culturas regionalas
Lo Front d'Esquèrra se caracteriza pas per aver un posicionament de sosten absolut a las lengas e culturas regionalas. E aquò se vei dins lo programa de Mélenchon. La siá idèia d'una França uniformizada, ont totes los ciutadans ajan los meteisses dreits e obligacions e parlen la meteissa lenga, se pòt plan palpar pr'amor que dins tot lo programa i a pas cap de referéncia a aquesta question. Zèro. Quitament pas quand se parla de cultura. Ça que la, òc qu'i trobam de referéncias a l'importància de desvolopar la lenga francesa e de l'espandir internacionalament, a travèrs de las Alianças Francesas, los Licèus franceses, etc.
N'i a pro de l'OTAN
Una de las proposicions mai radicalas en matèria de politica internacionala es la sortida de França de l'OTAN. Mélenchon tanben prepausa fòrça cambiaments dins l'ÒNU. Per exemple, prepausa la creacion d'un Tribunal Internacional de justícia climatica, que deurà garantir de perseguir los delictes ecologics dins lo mond sencer.
Marçal Girbau per Jornalet
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ara s'ha de pensar amb la nova esquerra, e los comunistas son los que han de far mai per las lengas e nacions de l'estat francès,coma feren als paises de l'Est lo cap e lider Lenin que donet lo dret d'autodeterminacion a totas la nacions que ho volguessen.
L'esquèrra, aquò defend los pòbles. Lo que trepeja las lengas dels pòbles trepeja los pòbles que las parlan. Donc Melenchon es racista e non es donc pas d'esquèrra.
L'esquèrra ? Si que dominava, a un moment, en Aragon e Catalonha, just abans l'arribada dels carris d'assalh de la racalha franquista e de la l'aviacion nacional-socialista pangermanista. L'esquèrra, non èra pas aqueste partit "comunista" que menèt los eròis de la resisténcia republicana catalana e aragonesa a la retirada. Aquò, si qu'es lo partit de Melenchon.
Despuèi la retirada, demoram sense novèlas de l'esquèrra, mai que mai en França !!! L'esquèrra es mòrta a Guernicà, a Barcelona, a Saragòssa. L'esquèrra, èra quand lo pòble comandava, sense representants delegats, corruptibles a qui mai pòt. Tant ne sèm luènh, auèi !!!
E òc, lo Merluçon es mai vièlh de 5 ans e son esquèrra embaboquida per son lider màximo tanben.
Adiu en totes
Lo 23 d'abriu se volètz pas votar per Felip Poton o per Joan La Sala
Sul siti del Partit de la Nacion Occitana podètz telecargar a gratis un bulletin Occitania Liura / Oucitànio Liuro o Occitanie Libre e lo botar dins l'urna
http://lo.lugarn-pno.over-blog.org/2017/04/le-parti-de-la-nation-occitane-et-le-premier-tour.html
Mélenchon representa la vielha Franca, aquela qu'es estada educada dins la Franca una e indivisibla, qu'anava vers lo progres tecnic que devia menat au progres social, la Franca de la resistança quand lo parti socialiste disia : "contre lo matériau i a mas lo materiau", la Franca de la securitat sociala e de las retraitas, la Franca que luchava per l'autodetelminacion de l'Algeria, la Franca de Jacques Duclos en 1969 que faguet 23 dau cent a l'eleccion presidenciala (quand lo parti socialiste en avia mas 5 dau cent), la Franca que botet lo, cagolard Mitterand au poder, la Franca que se laisset ganhar per una colaboracion emben lo poder en plaça.
Aquela Franca a pus de repères a part la referença a la revolucion de 1789. Los trabalhadors an ren a ganhar dins la mondialisacion e la liberacion daus marchats. E l'òm dich que Mélenchon fai belcòp de votz chas los jòunes.
Belcòp de bonas causas mas las condicions economicas an evoluats. Sufis pus de nurir, vestir, lotgear per esser uros, sufis pus d'aprener per devenir riche e inteligent mas chacun a una personalitat que vai pas poder exprimat dins aquela societat ni a l'escòla. La França es devenguda una dictatura perque l'assemblada legislativa es mas una chambra d'enregistrament de las décisions de las multinacionalas. Sufis pas de cambiar la constitucion. Sufis pas d'aver un trabalh, mas un trabalh ente l'òm ressent que l'òm es mas un esclau es pas bon per la santat tant individuala qu'economica. Belcòp de causas a pensar mas Jornalet es plan embarrat dins sas oeillèras ideologicas e sa vielha educacion.
Neutralitat o parti pris dins la redaccion de l'article de Jornalet, l'òm pòd se pausar la question!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari