Bandièra01 1180x150: Comuna de Tolosa

Actualitats

Rugbi de XIII: bonas Pascas catalanas

Temps de prima e temps d’ensages per aquesta dimenjada tretzista pascala

Francis de Nadaï, d’escais Nanache, nos a quitats aquesta dimenjada a 77ans. Èra de l’esquipa de Limós e aviá portat 31 còps lo malhòt tricolòr. Un grand jogaire se’n va que teniá las plaças de pilar tanplan coma de segonda o de tresena linha
Francis de Nadaï, d’escais Nanache, nos a quitats aquesta dimenjada a 77ans. Èra de l’esquipa de Limós e aviá portat 31 còps lo malhòt tricolòr. Un grand jogaire se’n va que teniá las plaças de pilar tanplan coma de segonda o de tresena linha | FFRXIII
Superliga: Los Dragons regalan Brutus
 
Las partidas del Divendres Sant dependon de la tradicion. Cada an, se sap que serà programada una Wigan-St Helens o una St Helens-Wigan. Ongan, cò dels campions, los locals joguèron 70 minutas a 13 contra 12, ganhèron 29-18 e Morgan Escarré foguèt nomenat òme de la partida.
 
La jornada se dobriguèt tre lo dimècres amb la victòria dels Dragons catalans cò d’Huddersfield: 29-22. Dijòus, Warrington ganhèt a Widnes: 19-10. Divendres, Salford s’empleguèt per batre Leigh 12-6, Leeds s’impausèt largament a Hull 52-24 e lo cap de fila Castleford foguèt sens pietat per Wakefield: 42-24.
 
Diluns, una novèla jornada se tenguèt amb, per un còp, las 6 partidas lo meteis vèspre. Wigan va ganhar a Wakefield 16-10. St-Helens fa plegar lo cap de fila Castleford: 26-22. Warrington perseguís sa tièra de victòrias fàcia a Huddersfield: 26-24. Hull ganha a Leigh 24-10 e Leeds domina los Vikings de Widnes 42-22.
 
A Brutus, 11 000 espectators seguiguèron l’afrontament entre los catalans e Salford. Dins lo primièr temps, las defensas s’empleguèron, mas Vincent Duport marquèt dos ensages. Luke Walsh rajustèt las transformacions e una penalitat: 14-0 a la pausa. A la represa, Inu sautava lo mai naut sus una candela e puntava l’ensag, mas sus 100 m e una palma recuperada Justin Carney replicava. Fuòc de palha anglés, vist que los catalans ajustèron tres autres ensages e Walsh enquilhèt tanben dos tombats. Polida victòria dels Sang e Aur: 38-6.
 
Un viatge de tria espèra los Dragons aqueste dimenge cò de Wigan.
 
 
Championship: Tolosa se paga lo primièr
 
En Championship, Tolosa aviá tanben doas partidas de jogar. Perdèron divendres en mitan de jornada a Londres: 30-16, mas aqueste diluns a Blanhac capitèron de faire plegar lo primièr de la competicion qu’aviá ganhat tot dempuèi la debuta: victòria 14-6 fàcia a Hull-KR, dins una partida seguida per mai de 4000 espectators .
 
 
Elèit 1: la dimenjada dels vesitaires
 
Abans la Dimenjada Magica dels 29 e 30 d’abril, las cinc partidas de la dimenjada pascala an vist los vesitaires s’impausar: dissabte, Lesinhan ganhèt a Vilanòva: 36-22, los Dragonets a Albi: 36-20, Limós a Avinhon: 36-16 e Sent Gaudenç a Tolosa: 44-22. Dimenge, passejada de santat de Carcassona a Palau: 76-12!
 
Lo 30 d’abril, la partida ASC-Dragonets de la Dimenjada Magica fixarà la tresena plaça e lo calendièr definitiu de las fasas finalas.
 
 
Las mièjas de la Copa
 
Aquesta dimenjada, se jogaràn las mièjas finalas de la Copa Lòrd-Derby: dissabte, al Molin: Lesinhan-Limós. (15h30); a Domèc: Carcassona-Albi (18h30).
 
La finala se tendrà lo dimenge 7 de mai de vèspre a Avinhon.
 
 
Nanache: un grand se’n va
 
Aquesta fin de setmana, en país catalan, se moriguèt a l’atge de setanta ans Francis de Nadaï, que son escais èra Nanache). Èra de l’esquipa de Limós que ganhèt lo campionat de França en 1968 e aviá portat 31 còps lo malhòt tricolòr en un temps ont los Blaus batián Austràlia (16-13 a Tolosa en 68; 17-15 a Bradford en 1970). Foguèt capitani de la virada als Antipòdes de 1975, venguèt puèi quadre tecnic a la Federacion. Un grand jogaire se’n va que teniá las plaças de pilar tanplan coma de segonda o de tresena linha.
 
 
 
Alan Roch

 
abonar los amics de Jornalet
 
 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article