Bandièra01 1180x150: Comuna de Tolosa

Actualitats

Reialme Unit: Theresa May a anonciat d’eleccions anticipadas per l’8 de junh que ven

En plen procès de sortida de l’Union Europèa, la primièra ministra crei que “cal d’estabilitat e una direccion eficaça”

La primièra ministra britanica, Theresa May, estonèt ièr totòm en convocant d’eleccions legislativas anticipadas l’8 de junh que ven. En plen procès de sortida de l’Union Europèa, May a convocat lo vòte perque, segon ela, “cal d’estabilitat e una direccion eficaça”. Per tal de menar a bon tèrme lo Brexit, “i deuriá aver d’unitat a Westminster, mas n’i a pas”, çò diguèt.
 
Per poder avançar las eleccions, May a besonh del sosten de dos tèrces de la Cambra dels Comuns, e sembla que l’aurà. Los trabalhistas an anonciat que sostenon sa convocacion.
 
Los Liberals Democratas an reagit amb un comunicat en afirmant que “los trabalhistas ganharàn pas cap de sèti suls conservators”, e se presentan coma los sols capables de “prevenir una majoritat conservatritz”, e doncas d’evitar que Theresa May atenga una majoritat que li permeta de menar de politicas pus duras.
 
 
 
Sturgeon: “Alcem-nos per Escòcia!
 
De son costat, la primièra ministra escocesa, Nicola Sturgeon, faguèt de declaracions fòrça criticas amb las intencions de May. “Los tories veson l’oportunitat de mòure lo Reialme Unit devèrs la drecha, de forçar un Brexit dur e d’impausar de retalhadas mai prigondas. Alcem-nos per Escòcia!”
 
De fach, l’eleccion pòt èsser una escasença pel pòble d’Escòcia, mai que mai se l’eleccion deven un sondatge sus l’independéncia.
 
 
 
May cercariá d’enfortir sa direccion del Brexit
 
Segon una analisi de Vicent Partal, Theresa May cèrca d’enfortir e de legitimar sa direccion e son biais de comprene e de menar a bon pòrt lo Brexit. D’efièch, los sondatges assolidan que May ganhariá clarament.
 
 
abonar los amics de Jornalet
 
 




 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article