Bandièra01 1180x150: Comuna de Tolosa

Actualitats

Lo Bocau: i aurà una Ikastola mas pas cap de Calandreta

Malgrat l’interès del cònsol màger per l’escòla immersiva occitana, solament una familha s’es mostrada interessada del temps qu’un quinzenat an demandat l’educacion en lenga basca

| La Setmana
I aurà pas cap de Calandreta al Bocau (Bas Ador) la rintrada que ven. En novembre passat, raportàvem la creacion d’una escòla Calandreta-Ikastola menada a bon tèrme per la Federacion Departamentala de las Calandretas e Seaska, en seguida de l’interés manifestat per plusors familhas. Ça que la, lo projècte ven d’èsser validat sens la partida Calandreta, çò rapòrta La Setmana.
 
La rason es la manca d’inscripcions, malgrat los bons esfòrces de las associacions culturalas occitanas del país qu’organizèron doas amassadas d’informacion e que distribuiguèron de tractes durant un concèrt de Nadau dins lo parçan.
 
Lo cònsol del Bocau, Francis Gonzalez, aviá insistit sus l’installacion de la Calandreta dins sa comuna. Quand la federacion de l’escòla basca lo contactèt per la creacion de l’Ikastola, Gonzalez reclamèt que l’Ikastola se faguèsse pas sens la Calandreta. Mas se deguèt resignar en veire qu’aquela vila occitana del Bas Ador aviá desvelhat l’interès de 15 familhas per l’ensenhament en basco contra solament lo d’una familha per l’ensenhament en occitan.
 
Christophe Martin, conselhièr PS a la comuna del Bocau, se regaudiguèt de la creacion d’una Ikastola dins la vila mas volguèt recordar que “la responsabilitat municipau que pòrta purmèr sus l'auhèrta de l'ensenhament public”. De lor costat, los representants municipals de l’oposicion (PCF, Cambiem lo Bocau e PS) cranhon que la dobertura de l’Ikastola aja de consequéncias negativas pels efectius de l’escòla publica “dab un risc de barradura de classa”, e demandan que l’aprendissatge de las lengas “regionalas” se faga en classas bilingüas de l’ensenhament public, segon La Setmana.



abonar los amics de Jornalet
 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo raiòu Cevenas
8.

#6 Tot es dich ! Talament bien que i a pas res d'ajustar. Mès jonhisse los occitans d'aquel caire de Gasconha per lurs dire que comprene lo dòu qu'aquò deu èstre per eles veire lur lenga amai lur cultura remplaçadas doçament per lo basco. Amai s'aquò's de bòn dire, ensagèsson de se consolar emb de se dire : "Sarà quò de raubat au francés sobeiran"...

  • 11
  • 0
Tres forcas Lo Plan dar Riu
7.

#5 aicí es un mèdia en Occitan. Capissèm pas lo basco, enfin ieu (per aquò siáu benlèu pec...?). Mercés de revirar en occitan.

Adieussiatz

P. S.: Avètz un bèl nom de familha composat occitan. Dar rieu sec- Horquet mi sembla que donariá.

  • 4
  • 0
E Passa Que T Ai Vist Lo Clapàs (Montpelhièr)
6.

#4 Quand avètz 15 familhas que demandan l’ensenhament en basco e solament una que demanda l’ensenhament en occitan, es pas encausa d'un complòt d'envasion basc .
Es pas que lo rebat d'una realitat : i-a un voide linguistic creat e volgut per l'estat parisenc que s'es emplegat a escafar la lenga occitana. Las lengas mai reborsièras a-n-aquel escafament aprofeitan d'aquel voide, es un fenomen mecanic.
Disi pas que cal se'n regausir mas qu'es la dolenta realitat. Quand constatatz qu'uèi la lenga mai parlada que s'ausis pertot en defòra dau francès dins Occitània tota es l'arabi e non pus l'occitan es pas encausa d'un complòt linguistic arabi. L'estat parisenc a fach lo voide e ara aquel voide s'emplèna mecanicament de quicòm mai. Me'n regausissi pas, constati qu'es la realitat, l'amarganta realitat.
Es coma quand lo mètge vos diagnostica un cancer, òm pòt far coma se i-èra pas, mas malaürosament i-es, e s'espandis . Es la puta realitat e comprèni la ràbia dels gascons pel Bocau.

  • 20
  • 0
Gorka Darrieussec-Hourqué Tarnos
5.

#4 Bokaleko gurasoak gaituzue eta 2016ko udaberria geroztik, amaikastola baten sortzeko gogoa dugu. Euskarari atxikiak girelako, nahi dugu gure haurrek eskolan euskaraz ikas dezaten. Gaur egun, ikastolako imersioa da gure ustez sistema egokiena.

Adeitsuki

Gorka

  • 1
  • 3
Occitan alienat que cerca un auta cultura per èsser original
4.

Lo nom de la comuna qu'èi BOKALE. Eusquerizacion dau toponim occitan gascon.
Ei acabat amb Lo Bocau... Plegat,ringardizat.
Que's cau preparar de subir per la seguida, Lo Mont (de Marsan), Arcaishon... quin serà lor noms adara en basco?

Hè pensar a l'Ossau-Irati, qu'èi un hromatge mitat occitan e mitat basco, mès la publicitat hè tot com un produch totaument basco. E la vath d'Ossau qu'èi plan occitana gascona totun! Qui ac sap !?

  • 14
  • 0

Escriu un comentari sus aqueste article