Bandièra01 1180x150: Comuna de Tolosa

Actualitats

Campanha per menar los Goulamas-K a Barcelona dins l’encastre de la fèsta de Jornalet

Lo 1r de julhet, festejarem lo cinquen anniversari a Barcelona amb una festassa occitana. Ara podètz ajudar a finançar l’eveniment o simplament crompar las entradas per avança

L’Associacion per la Difusion d’Occitània en Catalonha (ADÒC) lança uèi una campanha de micromecenatge per finançar la fèsta del cinquen anniversari de Jornalet a Barcelona amb un cors d’iniciacion a la lenga, un balèti occitan e un concertàs de Goulamas-K.
 
A l’ocasion de l’anniversari d’aqueste jornal, la còla del sit de musica en catalan Via Sona nos a fach un bèl present: la sala de concèrt del Centre Artesà Tradicionàrius pel 1r de julhet. S’agís d’una de las melhoras salas de Barcelona amb una sonorizacion impecabla, e profecharem de l’escasença per i far una festassa, presentar nòstre mèdia al public catalan, e tanben nòstra lenga, nòstra cultura e nòstre país.
 
 
La campanha
 
La campanha se lança per tal de poder pagar los artistas e de los poder lotjar, s’adreiça mai que mai al public local, que poiràn comprar atal las entradas a l’avança, mas totòm pòt ajudar. En contrapartida, en mai de l’entrada al balèti e al concèrt, los donators obtendràn un mercejament public projectat sus las scèna e de recompensas amb una sabor occitana.
 
 
Las recompensas
 
Tots los apòrts recebràn un mercejament public e los noms se projectaràn sus scèna. A partir de dètz èuros, òm recebrà una intrada e serà convidat a una bièrra o una autra bevenda. En mai d’aquò, los dons pus generoses auràn de presents de Macarèl, e quitament poiràn publicar lors publicitats dins Jornalet.
 
 
La fèsta
 
Lo programa de la fèsta es:
 
18:00 - 20:00 Cors zèro d’occitan
20:30 - 22:00 Repais frairal
22:00 - 23:00 Balh tradicional amb Kaj Tiel Plu
23:30 - 01:00 Concèrt de Goulamas'K
 
L’eveniment serà presentat per la deputada aranesa Mireia Boya.
 
Kaj Tiel Plu es una banda catalana que difond la tradicion musicala d’Occitània e dels Païses Catalans a l’exterior en esperanto e en lengas originalas. An publicat tres disques amb l’ostal lauragués Vinilkosmo (Dònavila), e es un dels grops mai coneguts dins l’encastre cultural esperantista.
 
Goulamas’K es a l’ora d’ara la banda d’ska e ròck occitana de referéncia que festeja ongan son 18n anniversari. Amb sièis disques sortits, lo grop es sustot conegut per sos espectacles en dirècte. Lor son, a las aurelhas del public catalan, evòca los Obrint Pas. Ongan fan una virada per Occitània tota en presentant son nòu disc Resisténcia, e faràn un esfòrç màger per èsser presents lo 1r de julhet a Barcelona, e mai se l’endeman devon far un concèrt a Sent Severin, en Peiregòrd (Montmaurelian).

 
 
 
Fèsta de Jornalet amb Kaj Tiel Plu e Goulamas-K
Dissabte 1r de julhet a partir de 18h
Centre Artesà Tradicionàrius
Travessia de Sant Antoni 6-8 / Plaça Anna Frank
Barcelona

 
 
Far un don:

 
 
abonar los amics de Jornalet
 
 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma
1.

Bona pensada de portar cantaires occitans a Catalunya. Cal preparar-ho ben perquè sia una capitada. E far propaganda de l'acte.

  • 2
  • 0

Escriu un comentari sus aqueste article