Bandièra01 1180x150: Comuna de Tolosa

Actualitats

Emmanuel Macron serà lo nòu president de França

Marine Le Pen saluda son resultat recòrd, e mai se reconeis que cal transformar lo Front Nacional. Lo partit cambiarà quitament de nom

Los occitans d’Aran e de las Valadas poiràn contunhar de pagar en èuros dins la rèsta del país, almens durant los cinc ans que venon. Lo candidat del movement En Marcha, Emmanuel Macron, s’es impausat largament sus Marine Le Pen al segond torn de l’eleccion presidenciala francesa. De tot biais, Macron a ganhat sens grand estrambòrd de la part dels electors, dins una jornada marcada per l’abstencion e un recòrd de bulletins blancs o nuls. Podètz consultar los resultats oficials sul sit del ministèri de l’interior francés.
 
“Metrai tota mon energia per èsser digne de vòstra confiança”, çò assolidèt Macron, tanlèu conéisser lo resultat, per mercejar los qu’an votat per el. “Sabi la colèra, l’ansietat, los dobtes qu’un grand nombre d’entre vosautres an exprimits”, çò lor diguèt en tot precisar que son dever ara èra de lor portar de solucions.
 
“Defendrai França, sos interèsses e son imatge. Defendrai Euròpa, nòstra civilizacion e nòstre biais de viure corron un risc”, çò apondèt abans de prometre que França seriá un país lidèr de la lucha contra lo terrorisme.
 
 
Transformacion del Front Nacional
 
De son costat, Marine Le Pen reconeguèt immediatament sa desfacha, e mai saludèsse “un resultat istoric e massís” pel Front Nacional. Dins aquel sens, la candidata qu’aviá promés de far sortir França de l’èuro, afirmèt que tre ara se metriá al trabalh devèrs las legislativas en transformant son partit.
 
“Lo Front Nacional, que s’es engatjat dins una estrategia d’alianças, se deu renovelar prigondament per èsser a la nautor [...] dels espèrs dels franceses”, çò diguèt Le Pen ièr de ser davant sos electors a París. Per quant a el, lo numèro dos, Florian Philippot, indiquèt sul platèu de TF1 que lo partit anava “se transformar en una nòva fòrça politica que, per definicion, aurà pas lo meteis nom”.
 
 
Macron seriá lo fruch d’una “ascension ben calculada”
 
Benlèu la question qu’òm se pausa mai a l’ora d’ara es precisament qual es Macron e d’ont es sortit? E mai s’avèm l’imatge qu’es un òme sortit d’enluòc que ven d’espelir en politica, lo nòu president de França seriá lo fruch d’una “ascension ben calculada”, segon lo sociològ nòrd-catalan Gautier Sabrià. Dins una entrevista facha per Nationalia, Sabrià remembra que Macron, “coma tantes autres elegits de l’estat francés, es passat per las Sciéncias Politicas de l’Escòla Nacionala [vòl dire estatala] d’Administracion (EN) e a trabalhat dins lo sector privat. Trabalhèt per la Banca Rothschild, una banca de luxe per de gents fòrça ricas”.
 
Èx-ministre de l’economia de Manuel Valls d’ont “partiguèt amb una cèrta tranquillitat”, Sabrià crei qu’es interessant d’agachar la trajectòria de Macron per comprene çò que s’es passat. “Macron s’es plaçat coma una mena d’apologia del self made man estatsunidenc. Sa carga de ministre li permetèt d’aumentar sos ligams d’un latz, mas tanben de marcar sa diferéncia amb la rèsta del partit, pr’amor que fòrça sovent s’afrontava a d’autres ministres”. Dins aquel sens, Gautier insinua que “partir e se desmarcar del govèrn èra imprescindible per el”.
 
Podètz legir l’entrevista completa sul sit de Nationalia, ont tanben s’analisa la desdemonizacion del Front Nacional.
 
 
Favorable a una politica lingüistica per l’occitan
 
Emmanuel Macron a respondut favorablament a totas las questions de la campanha #2017oc, lançada pels actors màgers de l’occitanisme qu’an questionat los candidats a l’eleccion presidenciala sus l’avenir de la lenga occitana.
 
Dins sas responsas, Macron se declara favorable a la definicion e la mesa en òbra d’una politica lingüistica per l’occitan, a un projècte de lei per que França dispause d’una lei en favor de sas lengas e lor done un estatut idonèu, e enfin a una lei qu’assegure una veritabla reconeissença e un estatut a las lengas autoctònas de l’estat.
 
Dins l’encastre de l’educacion, Macron crei qu’una reconeissença juridica e un estatut son indispensables e s’engatja a facilitar l’aprendissatge de l’occitan dont l’interès educatiu, lingüistic e cultural es reconegut.
 
Veirem ben.
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Chevallier e Laspalès Simca Mila City
18.

#12 Brigida Macron, I suppose ? Compliments !

  • 10
  • 0
Alibert L Alcazar, Marsiho
17.

Visca lo rei !Visca lo rei !Visca lo rei ! Ah!Ah!Ah!Ah!Ah! E sonatz aquò una republica ? Tron de l'èr, qué rire! Qué rire!!!

  • 11
  • 0
Baby Istanbul
16.

#15 Non, fasètz una error. Dels 66% qu'an botat un bulletin Macron, 43% an pas votat per el mas contra Le Pen. Ara, los que l'an menat al poder per aquel còp d'Estat mediatico-oligarquic se foton plan de tot ce que van poder dire los nècis qu'an votat per el e que dison ara que lo van pas daissar menar sa politica. A lo poder e punt !

  • 5
  • 0
Francesc Palma
15.

L'abstencion e los votes blancs suman lo 37 % per ara. Del 63 % que votare: 66% foguet per Manuel, lo que representa 2/3 parts dels vots emesos. Que representa un 41 % de recolsament popular. Una popularitat que arriba pas a la mitat de l'electorat.

  • 2
  • 0
Baby Lisbona
14.

#13 Per totes los nècis que son anats votar per Macron contra lo faissisme (la Le Pen a pas lo nivèl e voliá pas del poder), lo Golem de la banca e del grand capital (coma Pompidor e Giscard, mas el encara mai).
Un president elegit per environ 15% dels electors.
França es pas una democracia mas una dictatura dins la man de l'oligarquia capitalista mondialista.
Lo faissisme vertadièr l'avèm ara al poder.

  • 13
  • 1

Escriu un comentari sus aqueste article