Bandièra01 1180x150: Comuna de Tolosa

Actualitats

Rugbi de XIII: los Canaris se perlupan d’adòba de singlar (al corbièras, sioplèt!)

Una dimenjada de rugbi pòrta son lòt de jòias e de tristum. Se tira lo morre del costat de Perpinhan, Tolosa, o Auckland e se ritz del costat de Carcassona per exemple

Aqueste dissabte, los Dragons recebián Leeds
Aqueste dissabte, los Dragons recebián Leeds | Dragons Catalans
Paures Dragons!
 
Aqueste dissabte, los Dragons recebián Leeds. E la cordelada dels malastres s’alonguèt: Grèg Bird demorèt tres minutas sus la pelena (fractura al nivèl de la pometa), Anderson al cap d’un quart d’ora (cavilha) e Williame una ora (tocat al genolh). Ajustatz un arbitre que daissèt jogar los angleses als limits del fòrajòc e los Dracs tenguèron còp 75 minutas abans de plegar 30-24.
 
Aqueste divendres, un viatge malaisit s’anóncia del costat d’Hull FC per una partida eliminatòria de la Cup.
 
Decepcion tanben per Tolosa en Championship: desfaita a Swinton 27-20.
 
 
Lo cangoró sauta totjorn mai naut
 
Una tièra de partidas internacionalas, tastets per la Copa del Mond de la tardor, se debanava aquesta fin de setmana en Austràlia. Dins l’ANZAC-Test, a Canberra, Austràlia marquèt son territòri fàcia als neozelandeses: 24-0 a la pausa e 30-12 al final. A Campeltown, Anglatèrra anèt batre Samoa: 30-10 e Liban dominèt Malta: 24-4. Un ensag a la darrièra minuta permet a Tonga de batre Fidji: 26-24. Paposia capita de batre las Isclas Cook 32-22.
 
 
Los Canaris menan la farandòla
 
Solelh e vent al Pargue dels Espòrts d’Avinhon aqueste dimenge de vèspre. Dins un primièr temps, en egalizant a la darnièra minuta 36-36, aprèp èsser estat menats tota la partida per Tolosa, l’esquipa junior d’Avinhon ganha la Copa Nitard al nombre d’ensages.
 
Per la Copa Lòrd-Derby, majoritàriament se pensava que l’Ògre lesinhanés se chapariá lèu-fait una asteta de 17 Canaris. E de fait, aprèp una penalitat ensacada, los Verd e Blanc, en doas passas e 80 mètres de corsa, puntavan l’ensag (8a). Tornavan marcar mas l’arbitratge vidèo refusava l’ensag dels Molinièrs. Carcassona resistissiá; Gressèque passava una penalitat (19a), destillava una passa al pè per son capitani Bastian Escamilla que marcava (25a) e ajustava la transformacion del recanton. L’arrièr Miloudi recuperava una palma sus sos 10 mètres e, butat pel vent, l’anava pausar entre los pals verd e blanc, 90 mètres mai luènh. Per faire bon pes, Gressèque ajustava un tombat: 15-8 per Carcassona a la pausa.
 
Lesinhan marcava per son gigant Papali tre la represa. Amb la transformacion de Marginet, l’avança dels Canaris èra pas mai que d’un punt; Papali cresiá de tornar marcar mas lo cap de son pichon artelh s’èra pausat sus la linha de tòca! L’ASC se trufava d’una inferioritat numerica (en rason d’un carton jaune) e marcava: Baile lançava Vincenç Albèrt que se jogava de tres defensors (50a), Milodi trapava una òsca dins la defensa verda (53a) abans de destillar una passa al pè millimetrada per Vincenç Albèrt (62 ena); Gressèque ajustava una penalitat e Milodi un tombat. Los uèlhs escarrabilhats dels sostens de Ciutat vesián lo planchòt marcar un avantatge bèl: 30-14. Coma la lèbre de la faula, Lesinhan se ronzava enfin a l’ataca. Marcava dos còps (Tisseire a la 77a e Papali a la 79a), Marginet transformava lo primièr. Mas èra tròp tard: la Copa Lord-Derby preniá pel quatorzèn còp la rota de Carcassona. Marca finala: 30-24! La generositat, la volontat, la valentisa e la generositat an agut rason de la fòrça: lo vam d’una joinesa menada pels gronhards Gressèque e Saddaoui.
 
 
Plaça al campionat
 
La rota de las doas formacions se poiriá tornar crosar a la fin del mes per la mièja finala del campionat se Carcassona bat en barratge Avinhon aqueste dimenge 14 de mai a Domèc. L’autra partida Dragonets-Albi (a Sant Estève) determinarà l’adversari de Limós per l’autra mièja finala.
 
 
NRL: la jornada dels Indigènis
 
En Austràlia, la jornada venenta del campionat NRL se ditz la Jornada dels Indigènis per reconèisser l’apòrt bèl dels pòbles autoctòns al rugbi de XIII e en solidaritat amb eles. Ongan, se celebrarà los 50 ans del referendum que marquèt lor reconeissença. Totas las esquipas portaràn un malhòt especial per aquesta jornada: cadun aurà d’elements grafics dels pòbles autoctòns.
 
 
 
 
Alan Roch
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article