Los afogats d'astronomia seguissèm las nòvas de Cassini, qu’a començat sa darrièra mission e que nos revelarà los darrièrs secrets de Saturne. Mentretant, la sonda Juno —tanben de la NASA— a començat de mandar d’imatges espectacloses e estonants de Jupitèr. Juno es dins l’orbita de Jupitèr dempuèi l’estiu passat  e sa camèra potenta a fach d’imatges de Jupitèr d’una qualitat e espectaclositat jamai vistas. Aquelas fòtos, la NASA las a mesas a la disposicion dels internautas, per que las editen e permetan de n’observar melhor totes los detalhs, e las publica sus aqueste sit web.