Aquí de que faire somiar tot tretzista, una vertadièra Dimenjada Mirifica: divendres, los Dragons jogaràn en Superliga; dissabte e dimenge, las mièjas finalas del campionat d’Elèit 1; diluns, novèla partida dels Dragons e, ajustarem lo dimècres 31: primièr rescontre dels Estats d’Origina en Austràlia!

Campionat d’Elèit 1: qual serà a Narbona lo 3 de junh?
 
Los quatre qualificats per las mièjas finalas d’Elèit 1 an agut una quinzenada per sonhar las nafraduras, se preparar fisicament e psicologicament per aquestas partidas decisivas.
 
Primièr rendètz-vos: dissabte de vèspre a Limós (15h30) ont los campions actuals reçaupràn los Dragonets dins una partida que s’anóncia equilibrada.
 
Segond rendètz-vos, dimenge (16h) al Molin amb lo revenge de la finala de la Copa: Lesinhan ensajarà de confirmar sa primièra plaça al classament e Carcassona se presentarà segur de sas capacitats de contrar los Singlars. Aquò promet!
 
Se coneis los finalistas del campionat d’Elèit 2, una partida que se jogarà tanben lo dissabte 3 de junh a Narbona: los catalans de Bao, venceires sens pietat de Carpentràs (44-18), afrontaràn Vilafranca de Roergue, mai fòrt que Ferrals (33-18).
 
 
Dragons: colèra presidenciala
 
Dins l’encastre de la Dimenjada Magica, a Newcastle, los Dragons rescontravan aqueste dimenge en debuta de vèspre los Gigants d’Huddersfield. La partida foguèt la mens prolifica en punts de la dimenjada. Los Dragons marquèron d’entrada per Richie Myler, mas los Gigants egalizavan aprèp una penalitat just abans la pausa (6-6). Ian Thornley balhava l’avantatge als Sang e Aur tre la represa (10-6). Mas los catalans multiplicavan las aproximacions, las fautas de man e las decas penalizadas. Fin finala, plegavan e encaissavan dos ensages dins las 5 darrièras minutas per pèrdre 18-10 e sortir dels uèit primièrs al classament.
 
Colèra bèla del president Guasch qu’a remés tot lo mond dins l’avion direccion Perpinhan en plaça de la setmana prevista del costat de Manchester. Una brava explicacion de tèxte sufirà per una remobilizacion de mai en mai necessària abans d’anar desfisar Salford divendres en serada e de reçaupre Hull FC diluns 29 (20h) a Brutus?
 
La Dimenjada Magica, qu’a ramosat mai de 65 000 espectators, se dobriguèt dissabte per una victòria de Wakefield sus Widnes (34-12), seguida d’un carton de Saint Helens fàcia a Hull FC (45-0) e una egalitat entre Wigan e Warrington (24-24). Dimenge, aprèp la desfaita catalana, Salford batèt Leigh 36-22 e Castleford confirmèt d’un biais dinamic e ofensiu sa primièra plaça amb una victòria sus Leeds: 29-18.
 
 
Tolosa copa las alas de las Aglas
 
En Championship, Tolosa ganha un còp de mai a Blanhac en passant, dissabte, un 45-20 a las Aglas de Sheffield. La competicion organiza sa Dimenjada Magica: lo Summer Bash a Blackpool que veirà Tolosa (actualament segond al classament) rescontrar dimenge un concurrent per la qualificacion dins la pola per la montada en Superliga: Halifax. Una victòria tolosana metriá los adversaris del jorn a 4 punts.
 
 
En esperant lo primièr rescontre dels Estats d’Origina
 
Lo primièr afrontament de l’an entre las seleccions de Queensland e Nòva Galas del Sud es programat lo dimècres 31 de mai a Brisbane.
 
En esperant l’afrontament, en campionat NRL, l’onzena jornada a vist una victòria del cap de fila la Tempèsta de Melbourne sus l’estadi dels Lapinons: 14-6. Los Bròncos passan un 36-0 als Tigres de l’Oèst e los campions, las Làmias de Cronulla, son mai fòrts que los Vaquièrs: 18-14.
 
 
Prolongacion de la mòstra XIII a Albi.
 
Autra bona novèla pels tretzistas: los Archius departamentals de Tarn perlongan la presentacion dedicada al XIII, espòrt popular de Tarn, fins al 31 d’agost, e vos balhan rendètz-vos pel dimècres 7 junh de vèspre per una taula redonda sus l’istòria del rugbi de XIII.


Darrièra minuta: cambiament d’entraïnaire en cò dels Dragons
 
De retorn a Perpinhan, es l’entraïnaire Laurenç Fraissinós que paga la nòta de la cordelada de desfaitas dels Dragons. Es remplaçat a son pòste per son adjunt Michael Monagham e per l’entraïnaire de l’esquipa de resèrva, l’èx-Dragon Jiròni Guisset.

 
 
 
 
Alan Roch