Bandièra01 1180x150: Comuna de Tolosa

Actualitats

Quatre detenguts en relacion amb l’atemptat del Manchester Arena

Lo Reialme Unit declara lo nivèl maximal d’alèrta e l’armada fa foncion de polícia en tot patrolhar d'airals clau del país

Dimècres, la polícia arrestèt tres personas de mai presumidament restacadas a l’atemptat que lo patiguèt Manchester diluns passat, çò rapòrta l’AFP. Al total son ara quatre los detenguts en relacion amb l’atemptat contra lo public qu'assistissiá al concèrt d’Ariana Grande al Manchester Arena qu'a daissat 22 personas mòrtas e 59 de nafradas.
 
La primièra ministra del Reialme Unit, Theresa May, anoncièt aqueste dimècres passat que lo nivèl d’alèrta antiterrorista passava de “grèu” a “critic”, valent a dire lo maximal previst. La mesura l’a presa l'unitat antiterrorista dels servicis d’entresenhas interiors britanics, l’MI5, e se i prevei que l’armada faga foncion de polícia per tal de susvelhar la via publica, mai que mai los endreches fòrtament frequentats e d’installacions estrategicas.
 
May faguèt una compareissença après sa segonda reünion amb lo comitat d’emergéncia COBRA ont expliquèt:
 
“Las enquèstas fachas pendent tota la jornada an revelat la possibilitat que i aja un grop mai larg restacat a l’atemptat. Los servicis d’entresenhas son arribats a la conclusion que lo nivèl d’alèrta antiterrorista deu passar de grèu a critic; aquò implica que la possibilitat d’una ataca terrorista passe de fòrça probabla a imminenta”.
 
 Aquel aument del nivèl d’alèrta maximal implica que i aurà de ressorsas addicionalas a la disposicion de la polícia per garentir la seguretat dels ciutadans. Una mesura que fa partida d’un plan nomenat “Operacion Temperer” qu’es ja activat. Aquel plan prevei que l’armada prenga lo ròtle de la polícia armada, per permetre als agents de patrolhar d'airals clau del país. A mai, i aurà tanben de militars desplegats sus d’actes determinats, coma de concèrts, de festenals e d’eveniments esportius.



abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Lo govern angles ho un doble raser: los terroristas que financien eles e qu'envian a Siria, e los terroristas dolents que los foten bombas a Anglaretta. Es pas lo matei pegar que rebre.

  • 1
  • 0

Escriu un comentari sus aqueste article