Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaVencenc

Lo filme The Square del suedés Ruben Östlund a ganhat la Palma d’Aur de Canas contra tota espèra

Lo filme francés 120 battements par minute èra lo favorit e a obtengut lo grand prèmi de la jurada

| scanoir.co.uk
Acabèt ièr lo festenal de cinèma de Canas (Vencenc), qu’ongan a festejat son 70n anniversari. S’autregèt ièr los prèmis dins una bèla ceremònia de clavadura presentada per l’actritz Monica Belluci.
 
Lo filme The Square, del suedés Ruben Östlund, a ganhat la Palma d’Aur de Canas contra tota espèra. Lo filme es un drama que vira a l’entorn del director d’un musèu d’art modèrne e critica la pedantariá e l’impostura de l’encastre artistic. Es lo primièr còp qu’Östlund participava al festenal de cinèma de Provença, e mai s’es abitualament present dins los festenals de cinèma europèus, e l’an passat foguèt près d’èsser nomenat als Oscars per son filme Snow Therapy.
 
Lo filme francés 120 battements par minute èra lo favorit e a obtengut lo grand prèmi de la jurada. Coescrich e realizat per Robin Campillo, lo filme tracta l’activisme de l’associacion Act Up, en favor de las victimas del sida dins la França de Miterrand.
 
Lo prèmi de l’interpretacion femenina es estat autrejat a Diane Kruger per son ròtle dins Aus dem Nichts, de Fatih Akin. E lo prèmi d’interpretacion masculina l’an atribuit a Joaquin Phoenix per son ròtle dins You Were Never Really Here.
 
Lo prèmi de la jurada a recompensat lo filme rus Nelyubov, d’Andrei Zviagintsev.
 
Lo prèmi del scenari a dos laureats: lo grèc Gyorgos Lanthimos pel filme The Killing of a Sacred Deer e l’escocesa Lynne Ramsay pel filme You Were Never Really Here.
 
Tocant lo cortmetratge, la Palma d’Aur l’a ganhada lo chinés Qiu Yang per Xiao Cheng Er Yue. E la Camèra d’Aur, que guierdona un primièr filme, l’an autrejada a l’òbra Jeune femme, de Léonor Séraille.
 
 
Pas cap de prèmi per Netflix
 
Coma se podiá preveire après las declaracions de Pedro Almodóvar, president de la jurada del festenal, Netflix a solament obtengut lo Palm Dog, un prèmi informal autrejat al melhor can, qu’es estat Bruno, del filme The Meyerowitz stories.
 
Netflix a portat la polemica dins l’edicion d’ongan en i presentant dos filmes, que solament los farà veire a travèrs de sa plataforma de television. D’esplechaires de cinèma de tot l’estat francés an plangut que lo festenal aculhisca de filmes que se poiràn pas mostrar dins las salas de cinèma. Tanben lo president de la jurada, Pedro Almodóvar, se manifestèt dins aquel sens. “Las nòvas plataformas devon assumir e acceptar las nòrmas ja existentas”, çò diguèt lo realizaire espanhòl dins sa conferéncia de premsa a l’inauguracion de l’eveniment. “Seriá per ieu una granda paradòxa que la Palma d’Aur d’aqueste festenal de Canas, e quin autre prèmi que siá, se poguèsson pas veire dins las salas de cinèma”, çò precisèt.
 
E mai se l'organizacion del festival a ensajat de negociar amb Netflix fins al darrièr moment, es pas arribat a un acòrdi. Per aquela rason a anonciat qu’a partir de l’an que ven, las condicions seràn mai claras: i poirà pas participar cap de filme que se pòsca pas veire dins los cinèmas.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Donacian Auvèrnhe
1.

Ne'n deuriem pas gis parlar d'aquelh festenau vergonhós... Lhi fai gis besònh de reclama ! Avem pas d'autras iniciativas culturalas mai enteressantas de promòure vès nosautes en plaça d'aquela grand messa vanitosa de la parisencalha ?

  • 3
  • 1

Escriu un comentari sus aqueste article