L’artista Banksy a ofèrt un present als britanics de las circonscripcions de Bristol North West, Bristol West, North Somerset, Thornbury, Kingswood e Filton que vòten pas pels conservators a las eleccions del Reialme Unit que se tendràn deman. Dins una nòta publicada sus son sit web, Bansky a assegurat que mandarà una impression exclusiva als votants que li manden una fotografia que demòstre qu'an pas pres la bilheta del Partit Conservator.
 
L’avocat de l’artista a explicat qu'es una iniciativa de divertiment e que Bansky cèrca pas d’influir sus las decisions dels electors. A mai, a apondut que lo present a pas cap de valor monetària e qu’es pas qu’un remembre del material de la campanha electorala.
 
Banksy es un artista tant conegut coma desconegut. Son òbra engatjada, especialament a Calais, es fòrça celèbra, mas se desconeis son identitat. Dempuèi qualques annadas l’artista a mostrat un interès constant pel conflicte en Palestina, amb de memorablas òbras que denóncian la situacion e critican las politicas de l’estat d’Israèl, dont la bastison de la barralha de separacion, e s’es engatjat amb una ostalariá qu’evòca aquela barralha.