Bandièra01 1180x150: Comuna de Tolosa

Actualitats

Lo nòu ministre francés de l’educacion se mòstra favorable a l’ensenhament de l’occitan

Los presidents de Calandreta e de Seaska l’an rescontrat per li demandar un estatut per las lengas autoctònas dins l’ensenhament, e li far veire la marrida e malaisida situacion que patisson

Los presidents de Calandreta e de Seaska an rescontrat lo novèl ministre francés de l’educacion, Jean-Michel Blanquer, per li demandar un estatut per las lengas autoctònas dins l’ensenhament, e li far veire la marrida e malaisida situacion que patisson.
 
Blanquer se trobava dissabte passat, 3 de junh, a Biàrritz (Bas Ador) per participar al congrès de la FCPE, una escasença qu'arprofechèron los presidents de las escòlas associativas en lenga occitana e basca per lo rescontrar. Ansin, Joan-Loís Blenet, copresident de Calandreta, e Paxkal Indo, president de Seaska, expliquèron al nòu ministre lors chepics. Joan Loís Blenet o a explicat a la còla de Jornalet:
 
“Al contrari del francés e de las lengas estrangièras que son obligatòriàs, las lengas regionalas an pas d'estatut e demòran encara jos la règla del doble volontariat: lo de las familhas e tanben volontariat dels emplegats del servici public. Pasmens, las lengas regionalas son marcadas dins la Constitucion coma Patrimòni de França”.
 
Dins aquel sens, Blenet e Indo —acompanhats del director del Centre d’Animacion Pedagogica en Occitan, Hervé Couture— faguèron plan veire al ministre lo sosten politic a l’educacion dins las lengas pròprias. Per ansin presentèron la demanda d’una lei o reglamentacion per un estatut de las lengas mal nomenadas regionalas, amb qualques principis màgers, dont ne remarcam los seguents:
 
— La lenga “regionala” es de drech dins totes los establiments de sa zòna de
difusion. Valent a dire que demandan que i aja pas mai de vòtes de conselhs d’administracion o de professors per autorizar l'ensenhament de l'occitan, ni mai de possibilitats d'entrepachament o de refús dels inspectors.
 
—Pas de concurréncia amb las opcions e las lengas estrangièras. “De far d'occitan deu pas demandar al jove un sacrifici educatiu”.
 
— Que l’ensenhament de la lenga siá totjorn sul temps escolar.
 
Amb aquel estatut sollicitèron la reconeissença mai formala dels cinc rets d’ensenhament immersiu de l’estat, als quals apartenon Calandreta e Seaska.
 
 
Esperit de dobertura del ministre
 
Jean-Michel Blanquer auriá aculhit favorablament aquelas revendicacions. Segon Blenet, “lo ministre diguèt son acòrdi sus la necessitat de servar la diversitat lingüistica e culturala” e tanben “mostrèt un grand interès per l'experimentacion pedagogica e lo plurilingüisme que fasèm”.
 
Dins aquel sens, “avèm constatat un esperit de dobertura e lo ligam es pres amb lo ministre e son gabinet per far abans per l'occitan e las lengas regionalas”.
 
Aquel rescontre se faguèt gràcias a la demanda dels elegits, e particularament del President del Conselh Departamental dels Pirenèus Atlantics, Jean-Jacques Lasserre, e del vicepresident, Max Brisson.
 
 
Una ora d’occitan en mens en 6a
 
Mentretant, una letra de l’associacion dels ensenhaires d’occitan de l’educacion pubica (FÈLCO) denóncia que lo nòu govèrn de Macron aja decidit de suprimir una ora d’occitan per setmana en 6a.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Res Inexplicata Volans Puèglaurenç
18.

#16 E òc, en mai del decòr qu'es fòrça...eloquent, sufis d'agachar un briu las minas e mimicas que fan sus la fotò. Tot i-es.

  • 11
  • 0
Montbulaà Baiona
17.

La tòca deus qui s'encontran los ministres e membres deu lor ganinet n'ei pas briga de créder çò qui'us disen, qu'ei de'us har enténer la paraula lor e de trobar dab eths interlocutors tà continuar çò de començat.

Que seré totun illusòri d'alargar que los qui s'i hasón tà obtiéner l'accòrd (lo protocòle d'acòrd de deceme 1994) dab Bayrou (mei que mei la creacion de l'ISLRF, IUFM tà la formacion de tos los regents (tas) de las escòlas immersivas) e tots los autas acòrds ad arron, que credèn çò qui proclamavan los ministres (tirat Francés Bayrou qui tienó tau sistème immersiu las soas promessas). Tot qu'ei rapòrt de fòrças e tot çò d'aute que son vacitinacions.

  • 3
  • 0
E Passa Que T Ai Vist Lo Clapàs (Montpelhièr)
16.

Un ministre de la republica francimanda de Paris vos a reçauput a la lèu-lèu entre doas pòrtas ; diplomaticament, ipocritament , biaissudament, vos a dich per pas vos contrariar , en una formula vagassa made in ENA, qu'avia pas res contra lo fach de "servar la diversitat lingüistica e culturala” .
E i avètz cregut ?? Avètz cregut de vertat a-n-aquel badinatge passa-pertot que "manja pas de pan" e qu'engatja a pas res ?? Me damne, a creire qu'avètz totjorn pas compres çò que valon las paraulas d'un representant de la republica francimanda de Paris !

  • 27
  • 1
francesc palma
15.

Veirem !

  • 11
  • 0
Montbulaà Baiona
14.

#13 Aquò be i a lontemps qu'ac sabem ! Lavetz, per'mor d'aquò que'ns caleré hicar au lheit ? capbaishar ? N'ac crei pas. Qu'èi tostemps combatejar dab d'autes e totun a còps que ns'i èm escaduts a de bonas. E besonh taus calandrons !

  • 2
  • 0

Escriu un comentari sus aqueste article