Bandièra01 1180x150: Comuna de Tolosa

Actualitats

De manifestacions al Bascoat e en Galícia en sosten al referendum de Catalonha e Aran

A Bilbao, de milièrs de personas revendiquèron lo drech de decidir pels bascos mentre qu’a Compostèla exigissián de “democracia pels ciutadans catalans”

| Zigor Plazaola
Divendres passat, lo president de la Generalitat de Catalonha, Carles Puigdemont, anonciava que lo referendum per l’independéncia de Catalonha e Aran se tendriá lo 1r d’octòbre que ven. La responsa de l’estat espanhòl foguèt de menaças en tot assegurar qu’empedirián lo vòte.
 
Dins aquel encastre, al Bascoat e en Galícia, se tenguèron de manifestacions per sosténer lo referendum.
 
 
Per un referendum tanben al Bascoat
 
A Bilbao, de milièrs de personas s’acampèron dissabte per reclamar lo drech de decidir del Bascoat e mostrar lor solidaritat amb lo referendum catalan. Cridats pel collectiu Gure Esku Dago (Es entre nòstras mans), los manifestants faguèron una mosaïca giganta amb un ponch d’interrogacion.
 
Participèt a la manifestacion de Bilbao lo president d’Òmnium Cultural, Jordi Cuixart, que declarèt que i aviá una solidaritat partejada entre lo Bascoat e Catalonha, e que la libertat èra “un desir partejat per las doas nacions”.
 
Gure Esku Dago a organizat divèrsas mobilizacions e consultas popularas dins los darrièrs meses per que los ciutadans exprimiscan quin avenir politic vòlon pel Bascoat. La tòca del collectiu es d’arribar a far un referendum.
 

 
 
Galicia exigís de “democracia pels ciutadans catalans”
 
A Compostèla, una molonada emplissiá la famosa Plaça de l’Obradoiro, davant la catedrala, per sosténer lo referendum del 1r d’octòbre que ven en Catalonha, en respondent a la crida de dètz e sèt partits politics, sindicats e associacions jol lèma “aquò es democracia”.
 
L’acamp finiguèt amb un parladís esmovent de l’escrivan Suso de Toro, que podètz veire dins lo vidèo que seguís. De Toro demandèt la “democracia pels ciutadans catalans” e que se meta fin a “l’utilizacion d’una polícia secreta contra Catalonha”.
 
L’eveniment s’acabèt amb un vòte simbolic e lo cant dels imnes galèc e catalan.
 

 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Coma mai amics melhor.Compreni pas perquè Convergència no ha votat a favor d'Units Podem a la mocion de censura.

  • 0
  • 0

Escriu un comentari sus aqueste article