Bandièra01 1180x150: Comuna de Tolosa

Actualitats

Corsega: succès istoric de la coalicion autonomista e independentista a las legislativas

Pel primièr còp, dins tres de las quatre circonscripcions, los nacionalistas còrses son al segond torn; dos candidats son quitament en situacion de ganhar

| Femu A Corsica
Al primièr torn de las eleccions legislativas francesas, la coalicion Pè a Corsica (Per Corsega), que jonh autonomistas e independentistas insulars, a obtengut un succès istoric. Dins tres de las quatre circonscripcions, los nacionalistas còrses son arribats de se qualificar al segond torn, e dins la quatrena, la primièra circonscripcion de Corsega del Sud, sonque 13 voses an separat lo candidat de Pè a Corsica, Jean-Paul Carrolaggi, de la representanta de La Republica en Marcha, Maria Giudicelli, en segonda posicion.
 
En Nauta Corsega, los dos candidats nacionalistas an senhorejat l’escrutini. Se tracta de Michel Castellani, qu’a obtengut lo 30,42% dels vòtes fàcia al representant dels Republicans, lo deputat sortent Sauveur Gandolfi-Scheit, al 21,73%, dins la primièra circonscripcion. Dins la segonda, Jean-Félix Acquaviva es en situacion encara mai favorabla, amb lo 36,44% de las voses, davant lo 23,41% del candidat de La Republica en Marcha, Francis Giudici.
 
Dins la segonda circonscripcion de Corsega del Sud, lo representant de Pè a Corsica, Paul-André Colombani, a obtengut un fòrça bon resultat, al 29,09%, darrièr lo deputat sortent dels Republicans, Camille de Rocca Serra, al 35,99%, que sa familha ten la circonscripcion dempuèi totjorn. Cal remarcar que lo candidat macronista, lo cònsol de Bunifaziu, Jean-Charles Orsucci, arribat tresen al 24,80% e eliminat, se declara autonomista, coma o raportèt Corse-Matin.
 
Dins l’espèra del segond torn, la coalicion nacionalista, que dirigís la Collectivitat Territoriala de Corsega, se tròba ansin en situacion favorabla per abordar las eleccions territorialas de la fin d’ongan. En genièr de 2018, Corsega serà d’efièch una collectivitat dirigida per una assemblada unica, puèi que los dos conselhs departamentals desapareisseràn.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
7.

Avanti popolo,
a la riscorsa,
bandiera rosa,
bandiera Corsa!

  • 2
  • 0
Sant Pèire
5.

#2 Per pervenir fins a Corsega, al Macron e sa Republica, lor auriá calgut marchar sus l'aiga…

  • 5
  • 0
TM Tonmorre
4.

Autant brave come ei marrit un pòble que s'enfanga dins l'alienacion... Adiu Oxytany

  • 2
  • 2
Donacian
3.

Òu... Es tant brave un pòble que s'emancipa !

  • 3
  • 0

Escriu un comentari sus aqueste article