Bandièra01 1180x150: Comuna de Tolosa

Actualitats

Rugbi de XIII, Brutus: que los cardiacs s’abstengan!

Cal pas aver lo còr que pataqueja de tròp quand anatz seguir una partida de XIII e en particular dels Dragons catalans

Julian Bosquet, lo Salvador!
Julian Bosquet, lo Salvador!
Dragons: e Bosquet sortiguèt del bòsc…
 
Coma cada còp, la victòria èra imperativa pels Dragons amb la recepcion dels darrièrs, los Centurions de Leigh (ont jògan los ancians Dragons Pelissièr e Maria), aqueste dissabte 1r de julh. Los Dragons se trapèron lèu menats 18-0, tornèron a 18-12, abans d’encaissar dos novèls ensages abans la pausa. Per un d’eles, lo jogaire anglés recuperèt una palma amb lo pè en tòca, mas l’arbitre un pauc flac aqueste dissabte, demandèt pas lo vidèo. Per arrengar lo tot, a la mièja ora de jòc, lo mesclanha Myler se nafrèt a l’espatla: sason acabada. A la represa, lo public assistiguèt a una generala a l’anciana. Grèg Bird, assucat dins lo primièr temps, agèt dreit a dètz minutas de pausa suplementària amb un collèga anglés e amb un carton jaune. Los catalans tornèron a nautor: 34-34, mas encaissèron una penalitat. Sul darrièr balon de jogar, Aiton causiguèt de lançar, dins lo costat tampat, Julian Bosquet que s’anèt amorrar darrièr la linha alara que la còrna cornava. Victòria dels Dragons sul fial: 40-36!
 
E coma Warrington s’es fait batre per Wakefield 12-26, los Dragons remontan a la novena plaça. Caldrà gardar l’estat d’esperit del segond temps per reçaupre Wigan aqueste dissabte.
 
Malgrat lo retorn d’Hull FC dins lo darnièr quart d’ora, Castleford confirma qu’es plan lo cap de fila: victòria 24-22. Leeds passa davant Hull aprèp la victòria sus St Helens: 24-22 tanben!.
 
 
Partida decisiva per Tolosa
 
Per assegurar una plaça dins los quatre primièrs e la participacion a la pola de montada en Superliga, aqueste dissabte a Blanhac, lo Tolosa Olimpic a de besonh de batre son adversari dirècte per la quatrena plaça Halifax. Aqueste dimenge, Tolosa pèrd a Oldham 14-12 del temps qu’Halifax bat Bradford 20-18. Las doas formacions son a egalitat al classament, mas Tolosa a una melhora diferéncia de punts. 
 
 
NRL: en esperant lo tresen Estats d’origina
 
En Austràlia, lo campionat NRL se perseguís alara que lo tresen Estats d’origina se rapròcha: partida decisiva dimècres 12 de julh a Brisbane. La Tempèsta de Melbourne confirma sa primièra plaça en ganhant contra los Bròncos a Brisbane: 42-12. Los campions, las Làmias de Cronulla, van passar un 44-12 de mal engolir als Poletons de Sydney.
 
 
XIII-cadieral: la Copa del Mond se sarra
 
Es en Region Occitània que lo XIII de França de XIII-cadieral torna metre en jòc son títol de campion del Mond dins una competicion que recamparà sèt formacions: Anglatèrra, Austràlia, Escòcia, Espanha, França, Galas e Itàlia.
 
Aprèp una partida amicala França-Austràlia, lo dimars 18 de julh, a Limòs, las causas seriosas començaràn lo dijòus 20 dins lo novèl gimnasi de Carcassona, amb 3 partidas: Austràlia-Galas a 2 oras del vèspre, Escòcia-Itàlia a 4 e mièja e, aprèp la ceremònia oficiala de dobertura, lo revenge de la finala de 2013 entre França e Anglatèrra. Un repais dobèrt a totòm seguirà la partida (inscripcion: 04 68 47 74 74).
 
Pàmias reçauprà tres partidas lo dissabte 22, coma Sant Jòri lo diluns 24. Las partidas de fasa finala se debanaràn a Albi (dimars 25) e Tolosa (dimècres 26) abans la finala al Pargue de las Exposicions de Perpinhan lo divendres 28 de julh a 7 oras del vèspre.
 
 
Loló, lo tretzista
 
E nos cal saludar la memòria de Loló Nicolin que s’interessava plan al XIII: èra per exemple lo pairin de l’esquipa de França pel rescontre contra Anglatèrra a Avinhon, la tardor passada. Se somièt mai d’un còp costat tretzista que Loló balhèsse un còp de man a la montada en poissença del XIII al Clapàs. Ara, es tròp tard! Dins la colleccion de malhòts del president de la Palhada, en bona plaça, un malhòt d’Ivan Gressèque. Un rendètz-vos mancat que lèva pas res a l’engatjament de Loló pel fotbòl, las ajustas e l’espòrt en general.
 
 
 
 
Alan Roch
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article