Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaComengeCoserans

Lo 6 d’agost que ven, occitans e catalans s’amassaràn per 30n còp al pòrt de Salau

Pendent la Guèrra d’Espanha, de milièrs de republicans i passèron sul camin de l’exili

| CAÒC
Coma cada an dempuèi trenta ans, de centenats d’occitans e catalans s’amassaràn lo 6 d’agost, al pòrt de Salau, al limit occitanocatalan, en Coseran, a 2100 mètres d’altitud. Los participants pojaràn del costat occitan de Salau estant (Coseran), en tot marchar doas oras e mièja, e del costat catalan d’Esterri d’Àneu estant (Palhars Sobeiran) en tot caminar aperaquí 45 minutas. L’amassada es organizada pel CAÒC e per l’ASPIC, coma una escorreguda d’amistat e de revendicacion nacionala dels dos pòbles vesins.
 
Un còp al pòrt, i faràn d’actes d’afrairament amb un escambi de produches dels dos costats: de formatge, de vin, de liquors amb de ratafiat, de galetas, de chocolat, de carnsalada, etcetèra. Tanben i dançaràn de danças tradicionalas al son dels musicians pirenencs, occitans e catalans. A mai, auràn luòc, coma d’abitud, los discorses de benvenguda, las cançons e los imnes mentre que son issadas las doas bandièras.
 
L’emplaçament d’aquel pòrt es simbolic: es un camin natural entre Occitània e Catalonha qu’a servit istoricament per far de comèrci e per connectar los dos pòbles. Pendent la Guèrra d’Espanha, de milièrs de republicans i passèron sul camin de l’exili. De costuma, los occitans i pòrtan lo formatge del temps que los catalans venon amb lo vin.
 
 
Tanben de costuma i participan de musicians e d’elegits dels dos costats del “calhau”, e se revendica la cultura comuna occitanocatalana e las relacions transfrontalièras que deurián ligar los païses de Palhars e Coseran.
 
 
Camin d’exili
 
Ongan, a l’ocasion del 30n anniversari de l’eveniment, la Generalitat de Catalonha, inaugurarà a 12h30 una estèla per recordar l’istòria de l’endrech coma camin d’exili.
 
En mai d’aquò, la velha, lo dissabte 5 d’agost a 18h, se tendrà a l’Ecomusèu d’Esterri d’Àneu (Catalonha) la conferéncia “Lo pòrt de Salau: un camin d’exili, camin de patz” dicha per l’istorian Josep Calvèt. Puèi, a 22h, se debanarà un concèrt balèti amb lo grop catalan Semproniana e lo grop occitan Arredalh.
 
Podètz descargar lo programa d’aquela amassada occitanocatalana de referéncia.


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
1.

En temps d'Enric Garriga president del CAOC, es feren molts de viatges per Occitània, gràcies a el molts de catalans e dels PPCC podem dire que hem estat a Nimes, Avinhon, a Aigas Mortas, a Pau,Tolosa,.....e naturalament al port de Salau.

  • 1
  • 0

Escriu un comentari sus aqueste article