Bandièra01 1180x150: Comuna de Tolosa

Actualitats

Lo govèrn britanic assolida ara que cal un periòde de transicion abans lo Brexit

“Fa cinc setmanas, l'idèa d'un periòde de transicion èra un concèpte nòu”

Lo ministre britanic de las finanças, Philip Hammond, assegurèt ièr dimenge que la majoritat dels ministres del govèrn britanic èran de mai en mai convencuts del besonh d’un periòde de transicion per articular adeqüatament la sortida del Reialme Unit de l'Union Europèa.
 
“Fa cinc setmanas, l'idèa d’un periòde de transicion èra un concèpte nòu. Cresi qu’ara gaireben totes dins lo gabinet accèptan que i aja qualque transicion”, çò afirmèt Hammond a la BBC.
 
Uèi, lo ministre pel Brexit, David Davis, e sa còla començan a Brussèlas la primièra tièra dobèrta de las negociacions sul Brexit. “Intram ara dins lo procès de vertat amb lo començament de las negociacions e cresi que lo gabinet es unit sus una posicion que maximalize nòstre pes per negociar e obtenga lo melhor acòrdi possible per lo Reialme Unit”, çò argumentava.
 
Per quant a la durada del periòde de transicion, “dependrà del temps que caldrà per instaurar los nòus sistèmas per gerir de domenis coma las frontièras o l’immigracion, mas deuriá èsser un periòde definit e caldrà almens dos ans”, çò afortiguèt Hammond.
 
En mai d’aquò, aqueste reconeguèt que las entrepresas avián besonh de mai de clartat sus l’avenir institucional britanic: “Es absoludament evident que las entrepresas espèran d’aver mai de clartat sus cossí serà lo futur de la relacion amb Euròpa”, çò diguèt.
 
De son costat, lo ministre de Comèrci, Liam Fox, acceptèt la possibilitat d’un periòde de transicion, a condicion qu’aguèsse “de limits”, coma o declarèt a la BBC.
 
“Vòli un periòde de transicion que poscam negociar d'acòrdis (comercials). Çò que volèm es un ponch de partença amb la libertat de negociar nòstres acòrdis comercials”, çò expliquèt.
 
Fox avertiguèt que seriá “estupid” d’intrar dins las negociacions pel Brexit sens èsser dispausats a las abandonar. Los negociators de l'UE devon creire que lo Reialme Unit causirà la rompedura puslèu qu'acceptar un marrit acòrdi. 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article