Bandièra01 1180x150: Comuna de Tolosa

Actualitats

Rugbi de XIII-cadieral: los Blaus son los campions!

Los Blaus demòran campions del Mond de XIII-cadieral
Los Blaus demòran campions del Mond de XIII-cadieral | FFR13
La victòria, aquò fa de ben, sustot al cap d’una partida sarrada que ne cal esperar la resulta fins a la darrièra segonda. E aquò foguèt lo cas aqueste divendres de ser al Pargue de las exposicions de Perpinhan.
 
 
XIII-cadieral: los Blaus sèrvan la copa mondiala al cap de l’angoissa
 
En quart de finala, los italians creèron la suspresa en batent Galas (78-36), mas en mièja finala poguèron pas res contra França: 98-6.
 
Anglatèrra passèt sens problèma l’obstacle australian: 78-36.
 
Divendres, mai de 2 500 espectators se trapèron al Pargue de las Exposicions de Perpinhan, transformat en sala d’espòrts. Dins lo primièr temps, los angleses se mostrèron los mai actius fàcia a de Blaus un pauc entrepreses. Los angleses menèron 10-0, mas un ensag dins la darrièra minuta permetèt als Pols d’egalizar just abans la pausa.
 
A la represa, los angleses agantèron los Blaus  (bon, se pòt pas dire a freg, vist la calor dins la sala), e marquèron dos ensages per menar 22-10. Lo capitani blanc James Brown se mostrava inagantable. Los Blaus tornavan a nautor dels angleses e prenián pel primièr còp de la partida l’avantage 26-22 a la 55a minuta. Mas los angleses replicavan e tornavan passar davant a dètz minutas de la fin: 34-26. Nicolau Clausèls raprochava los Pols a la 72a minuta (32-34, amb una transformacion de Torrés), abans de faire capvirar la partida a tres minutas del tèrme: sus un cinquen tengut, preniá l’opcion la mai improbabla: traucar al còr de la defensa anglesa, un còp de ren, una man que pòt pas arrancar la correja: ensag al pè dels pals, transformacion del capitani Torrés, doas minutas a defendre e la còrna que saluda lo succès dels Blaus: 38-34! Un grand espet de jòia! La Copa demòra al país!
 
 
XIII de França: estagi al Barcarès
 
En vista de la Copa del Mond, l’enquadrament del XIII de França organizèt dimècres 26 e dijòus 27 un recampament de dos jorns dels 32 preseleccionats al Barcarès. A l’òrdre del jorn: la coesion del grop amb, mai que mai, d’activitats aqüaticas e un pauc de vidèo. Novèl recampament previst a la fin d’agost. La lista definitiva dels seleccionats serà balhada a la mitat de setembre. Un rescontre amical contra Jamaïca, lo 13 d’octobre a Perpinhan, precedirà l’envòl per Austràlia.
 
 
Hull FC vòl gardar la Cup
 
La finala de la Cup se debanarà lo dissabte 26 d’agost a Wembley. Hull FC ensajarà de gardar lo trofèu aprèp aver eliminat sens contèsta possibla Leeds aqueste dissabte sus la pelena de Doncaster: 43-24, en marcant 7 ensages transformats e un tombat per faire bona mesura.
 
Dimenge, a Warrington, la partida foguèt mai sarrada. Al cap d’un quart d’ora, Wigan menava 12-0 mas a la pausa, Salford aviá fait mai que son retard: 14-12 pels Diables roges. Dins lo segond temps, Wigan egalizèt sus penalitat. A l’ora de jòc, un còp de pè de recentratge de l’alièr Burgess balhava l’avantatge a Wigan que Sam Tomkins confirmava per un tombat. Lo darrièr ensag transformat sus la còrna (27-14) mandava pel 31n còp Wigan en finala de la Cup.
 
 
Los campionats reprenon
 
Los Dragons se trapan dins la competicion del 8 del Mitan que recampa los darrièrs 4 de Superliga e los primièrs 4 del Championship. En jòc: quatre plaças en Superliga per la sason venenta.
 
Los Dragons catalans començaràn aquesta novèla competicion amb la recepcion de Londres aqueste dissabte 5 d’agost (18h, Brutus). Sus lor estadi, reçaupràn puèi: Leigh (19 d’agost), Featherstone (9 de setembre) e Widnes (23 de setembre). Aniràn a Warrington (12 d’agost), Halifax (10 de setembre) e Hull KR (17 de setembre).
 
En Superliga, las 8 formacions qualificadas gardan los punts de la primièra fasa. Castleford reçauprà St Helens dijòus. Seguiràn: Huddersfield-Wakefield, Hull-FC/Salford e Leeds-Wigan divendres.
 
Tolosa disputa lo Bloquièr que recampa las formacions classadas de la cinquena a la dotzena plaça de la primièra fasa del Championship. Los darrièrs 2 davalaràn en League One. Coma las esquipas gardan los punts aquerits, Tolosa a pas cap de lagui de se faire per demorar en Championship que 4 formacions ja los pòdon pas ragantar! Dimenge, aniràn rescontrar lo darrièr: Bradford.
 
 
NRL: la Tempèsta mena lo bal
 
En Austràlia, la Tempèsta de Melbourne domina las Aglas de Manly: 40-6. Los segonds, los Poletons, baton los Bròncos: 22-16.
 
 
 
 
 
Alan Roch

 

abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alaric
1.

Un agach abracat que manca jamai d'esser ponchur e d'actualitat e totjorn sens omissions subre totas las veshigas que l'om pot tocar sus los prats. Merces plan

  • 0
  • 0

Escriu un comentari sus aqueste article