Bandièra01 1180x150: Comuna de Tolosa

Actualitats

Lengadòc e Catalonha seràn connectats pel TGV en abril de 2013

| La Moncloa

Los presidents francés e espanhòl, reünits dimècres passat a París, s’acordèron per la connexion del TGV de Perpinhan a Barcelona per abril de 2013. S’acordèron tanben per lo passatge de la linha electrica de fòrça nauta tension (FNT) e demandèron que s’avancèsse en l’union bancària europèa.


Lo president francés, François Hollande, recebèt dimècres passat a París lo president espanhòl, Mariano Rajoy. S’agissiá de la primièra amassada entre los dos presidents a París, que balhèt l’impuls final per que lo tren de granda velocitat (TGV) Barcelona-Figueres-Perpinhan comence de circular en abril de 2013.
 
Lo cònsol de Girona, Carles Puigdemont, mostrèt son indignacion per n’èsser assabentat per la premsa e planguèt lo “prigond mesprètz” d’aquela manca de comunicacion.
 
Rajoy e Hollande anoncièron tanben un autre acòrdi bilateral: que la linha de fòrça nauta tension (FNT) travèrse la frontièra estatala per Catalonha e comence de foncionar a partir de 2014.
 
 
Union bancària, prioritat comuna
 
Al delà, los dos mandataris reïterèron las demandas per que s’avance en l’union bancària europèa, una union bancària que, segon los presidents, deu far venir la Banca Centrala Europèa (BCE) la vertadièra supervisora de totas las entitats bancàrias.
 
Après l’amassada, dins la conferéncia de premsa, Rajoy volguèt pas respondre s’Espanha demandarà los fonzes de salvament europèus, en tot dire que “la responsa es la que vos imaginatz”.
 
A una setmana del Conselh Europèu de Brussèlas, lo president espanhòl a intensificat la siá agenda per cercar de sostens en un moment complicat. De fach, Rajoy anèt a París l’endeman que França ratifiquèsse lo Tractat d’Estabilitat, qu’obliga de complir los objectius de deficit, e dins lo moment de mai bassa popularitat del president Hollande, qu’es obligat el tanben de far de reduccions budgetàrias.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Laurenç
2.

Cau díser que se baten los nòstes elegits regionaus entà aver a tota fòrça lo TGV (qu'ei "lo saunei" d'estar a 3 oras de París dempuish Tolosa o alavetz a ua ora e mièja dempuish Bordèu). Mès ne's baten pas guaire entà sauvar linhas com la de Besièrs-Clarmont d'Auvernhe (quasi 6 oras de tren !!!). Ne hèn pas arren tanpauc entà desvolopar relacions entre Tolosa e Barcelona (2 cambiaments e quaucom com 5 oras de tren !).

  • 8
  • 0
BOURDON Auloron
1.

Tà quan linhas de camin de hèr transoccitanas oèst-èst e nòrd-sud ? Tà un gascon, qu'ei mei viste hèit d'anar tà París que tà Marselha o Clarmont, n'ei pas normau.

  • 11
  • 0

Escriu un comentari sus aqueste article