Tolosa (BO) 32-13 Racing
 
Tresau des·hèita consecutiva peus parisencs mes uei los tolosencs n'avèvan pas lo dreit a la peca. Los parisencs compliquèren lo tribalh dab un ensai après vint minutas de jòc. A falut esperar las darrèiras minutas aus roge e negre per marcar l'ensai deu bonus ofensiu.
 
 
Tolon 24-19 Estadi Francés (BD)
 
Los suportaires tolonés an vist set ensais dissabte passat. Uei n'èra pas la medisha causa dab lo solet ensai de Bonneval peus visitaires. Mès aquera sason, serà complicat d'anar ganhar a Mayol. A dètz minutas de la fin los parisencs èran davant au planchòt mes Wilkinson profeitèt de las pecas deus visitors per assegurar la victòria de la soa esquipa.
 
 
Grenòble 34-21 Biàrritz
 
Un còp de mei, bona partida deus arpitans, dab una dominacion generau dens lo jòc!! Los bascos n'an pas jamei podut passar davant au planchòt. A la tempsada la partida qu'èra acabada dab un 19 a  6 normau. Èra la sheisau des·hèita consecutiva deus roge e blanc en Top 14.
 
 
Castras 38-36 Perpinhan (BD)
 
Tres ensais a tres, vaquí un resultat e sustot una fin de partida completament hòla. Kockott marquèt de cinquanta mètres la penalitat de la victòria a la darrèira minuta. Los castrés dominèren la purmèira tempsada dab un 23 a 16 representatiu de la lora dominacion . Mès los catalans pensèren har l'espleit de la jornada dab una dusau tempsada de qualitat mès l'indisciplina es autant importanta a vint com a cinquanta mètres de la linha.
 
 
Baiona 22-11 Bègla-Bordèu
 
L'Aviron qu'èra esperat peu son public après los 59 punts près a Tolon. Dens los jornaus expliquèren aver hèit l'impàs dissabte passat. Es aisit de díser mès ne fau pas se mancar per la seguida. An hèit una bona partida contra Bègla, mes èran ajudats per l'indisciplina cronica deus girondins dab aqueth còp dus cartons jaunes.
 
 
Agen (BD) 11-18 Clarmont
 
Clarmont dens las lutas per las dusaus purmèiras plaças n'avèva pas lo dreit de pérder. Deu son costat Agen èra dens la medisha situacion mès per sortir de las duas darrèiras pausicions au classament. Mès la dominacion èra jaune e blu e èran tostemps davant au planchòt. La partida èra equilibrada mès Agen n'a pas jamei avut la possibiltat de préner lo mielhor suus clarmontés. Lo calendari complica enqüèra un chic mei la situacion dab dus desplaçaments consecutius e la recepcion deus tolonés. Ops!!
 
 
Montpelhièr 32-16 Lo Mont
 
Lo principau peus montpelhierencs èra lo punt de bonus ofensiu. N'an pas mancat aquera ocasion per assegurar la quatau plaça au classament. Com tostemps los montés an jogat a hons e l'ensai a la darrèira minuta es meritat mès com de costuma l'indisciplina e los dus cartons jaunes ne permeteishen pas aus landés l'esper de ganhar una partida a l'exterior.
 
 

1 Tolon	41	10	9	0	1	308	160	148
2 Clarmont	36	10	8	0	2	223	152	71
3 Tolosa	34	10	7	0	3	316	201	115
4 Montpelhièr	32	10	7	0	3	207	175	32
5 Castras	28	10	6	1	3	231	189	42
6 Grenòble	26	10	6	0	4	261	233	28
7 Perpinhan	21	10	4	0	6	235	252	-17
8 Biàrritz	20	10	4	0	6	191	200	-9
9  Estadi Francés	20	10	4	1	5	233	244	-11
10 Racing	20	10	4	0	6	164	185	-21
11 Baiona	19	10	4	0	6	152	234	-82
12 Bègla-Bordèu	15	10	3	0	7	193	243	-50
13Agen	15	10	3	0	7	182	277	-95
14 lo Mont	2	10	0	0	10	138	289	-151

 
 


Eric Goyhenne