La Constitucion de la futura republica de Catalonha e Aran sonharà l’assemblatge de la realitat e de la personalitat d’Aran dins aquel nòu estat. Per far aquò, quand lo Parlament o decidirà, se crearà una comission d’expèrts qu’elaborarà los contenguts que tòquen lo país occitan dins aquela Constitucion. Aquò es un dels engatjaments eissits de la reünion que tenguèron lo 14 d'abril passat a Barcelona lo president de la Generalitat de Catalonha Carles Puigdemont e lo sindic d’Aran Carlos Barrera. Se tracta d’un engatjament que “mos darà ara Val d’Aran era reconeishença identitària e de país”, çò manifestèt lo sindic.
 
Comission bilaterala e budget
 
En mai d’aquò, se parlèt fòrça del present, e mai que mai d’aplicar la Lei d’Aran en de faches concrets per respondre als besonhs d’Aran. Dins aquel sens s’es decidit de crear una comission bilaterala entre los govèrns dels dos païses que seguirà lo transferiment de las competéncias e que n’aumentarà lo finançament. Aital, amb l’aprobacion del butget del Govèrn de la Generalitat de Catalonha, s’aprovarà lo budget del Govèrn d’Aran que, per 2016, serà de 22 600 196,50 èuros, al delà del fons de cooperacion e de las convencions qu’establiscan los diferents departaments governamentals.
 
 
Negociacion del deute
 
En mai d’aquò Barrera remembrèt a Puigdemont lo deute de 3,8 milions d’èuros que lo Govèrn de la Generalitat a pas pagat al Govèrn d’Aran, correspondent al finançament de 2007 fins a 2011, e tanben los mai de 2 milions que mancan en infrastructuras. Puigdemont reconeguèt lo deute e diguèt que sa liquidacion es prioritària.
 
 
Residéncia geriatrica
 
Tanben s’es decidit de bastir una nòva residéncia geriatrica en Aran, que lo Conselh General d’Aran n’assumirà la construccion e la Generalitat de Catalonha lo finançament de 20 plaças.
 
 
Puigdemont assistirà al Jorn Nacional d’Aran
 
Puigdemont vesitarà la Val d’Aran lo 17 de junh que ven, que lo país i celebrarà son jorn nacional en commemoracion de la restauracion del Conselh General lo 17 de junh de 1990, 151 ans après son abolicion per las autoritats espanhòlas. Ongan la celebracion serà especiala car se commemòra lo 25n anniversari d’aquela reïnstauracion.
 
 
Engatjament per l’occitan
 
Interrogat per Jornalet a prepaus de las politicas lingüisticas per l’occitan, lo sindic a manifestat que, per son govèrn, son la prioritat mai nauta. “Era nòsta lengua, ei çò que hè que sigam un país e non ua comarca mès”, çò diguèt.