Bandièra01 1180x150: Comuna de Tolosa

editorial

Catalonha e Aran: la rintrada s’anóncia cauda

| @ElJusticier1714
La Diada d'ongan en Catalonha es estada excepcionala. Pel primièr còp en democracia, los catalans an celebrat lor fèsta nacionala amb lors elegits e representants encarcerats o exiliats. A l'espèra del jutjament que deu arribar aquesta davalada, sètze elegits o èx-elegits catalans son d’efièch en preson preventiva o en exili.
 
Amb aquela repression, l'estat espanhòl a ganhat una batalha importanta dins lo procès independentista de Catalonha e d’Aran. La revendicacion del pòble se centra ara sus la liberacion dels presonièrs e lo retorn dels exiliats del temps que la revendicacion de l'independéncia demòra al segond plan.
 
Pasmens, aquela arma que l’a emplegada l'unionisme se poiriá revirar contra el. Segon los sondatges, l'independentisme es a montar cada còp mai mentre que los partits unionistas pèrdon de simpatizants. Los mèdias espanhòls fan d'esfòrces per justificar l'encarceracion dels presonièrs politics, mas lo fach quita pas d'èsser revoltant. En mai d'aquò, las justícias de Belgica, de Soïssa, d’Escòcia e d’Alemanha an rebutat los mandats d'arrèst europèus de la justícia espanhòla que devián far extradir los exiliats, e pertot se denóncia l'existéncia de presonièrs politics. La justícia bèlga a cridat lo jutge espanhòl Pablo Llarena. La justícia espanhòla, e los mèdias del país, perseguisson los avocats dels independentistas... Catalonha es a viure ongan una rintrada fòrça cauda.
 
L'unionisme s'es mostrat agressiu e violent en atacant los simbòls e las personas. Lo sentiment general es que, del temps que los independentistas bastisson, los unionistas destruson; del temps que los unes prepausan, los autres encarcèran; del temps que los unes plaçan de ribans jaunes per denonciar que i a de presonièrs politics, los autres los tiran en violent lo drech de liura expression.
 
L'11 de setembre passat, Catalonha demostrèt que l'independentisme èra pas las.  Après 12 annadas de mobilizacions subrenombrosas, lo sobeiranisme catalan se mostrèt pus fòrt que jamai en manifestant a Barcelona per la Republica Catalana. Segon la polícia, èran un milion de personas, mas qualques unes calculan que i aviá mai de manifestants, en prenent en compte la largor de l'Avenguda Diagonala e la longor del cortègi de sièis quilomètres. Aquel meteis jorn, lo partit espanholista Ciutadans organizèt un parladís sus la Plaça del Rei de Barcelona ont a pena assistiguèt un centenat de personas. E segon los sondatges, l'independentisme es a pojar cada jorn mai.
 
Après l'11 de setembre, vendrà l'anniversari del referendum del 1r d'octòbre, ont se remembrarà la grèva violéncia de la polícia espanhòla contra lo pòble que votava. Puèi i aurà lo jutjament dels representants independentistas ont s’acceptarà pas qu'un aquitament. E mentretant, cada jorn i a d'acamps per la libertat. Lo nòu govèrn de Madrid refusa de negociar, exactament coma o fasiá l'anterior... mas cossí se poiriá negociar amb los representants d'un camp en preson? Los jorns avenidors seràn cauds, fòrça cauds, en Catalonha e Aran.

            
            
        
    
fffff fffff
 Un ponch sus la situacion financièra de Jornalet
 
Coma o auretz remarcat, la còla dels Amics de Jornalet a lançat una campanha per ajudar las finanças d'aqueste quotidian occitan en linha. E mai ajam recebut d'ajudas de la Generalitat de Catalonha e del Conselh General d'Aran, i a de pagaments que son pas encara arribats e que, per de rasons burocraticas e politicas, vendràn amb qualques meses de retard. E mai avèm patit lo malastre d'aver de pagar de reparacions caras dels espleches informatics. Sèm doncas dins una situacion excepcionalament trista. Per astre, sembla que la solidaritat comence d’arribar lèu e de pertot dins lo país. Se capitam a téner entrò la fin de decembre, poirem salvar Jornalet.
 
Mercés plan!
 
   




abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pjm pjm
3.

Quiòc, contunhatz de nos téner au fiu de l'actualitat politica e sociala en Catalonha. Vertat qu'ende se n'assabentar, n'existíssen pas de mediàs en catalan, tanpauc suu web tanpauc sus papèir (pas de quotidian, pas de setmanèir, pas de magazines a tots subjèctes, pas de ràdio, pas de television).

L'actualitat occitana es dejà plan cubèrta alhors, pas besunh de quichar encara dessús. E lo nivèth de consciéncia de se-medish dens la poblacion occitana pro haut ende bastir societat, lavetz se podem centrar sus la politica internacionala, segur.

  • 2
  • 1
Pirolet
2.

Urosament qu'avèm Jornalet perdequé los autre mèdias practican l'omertà. A tot lo mai, "C'est politique " de diumenge mòstra d'imatges de la manifestacion de Barcelona sens cap de comentari.

  • 5
  • 0
Lo raiòu Cevenas
1.

Contunhessiatz, se vos plai, de nos téner au fiu de l'actualitat politica e sociala en Catalonha. Gramecí.

  • 8
  • 0

Escriu un comentari sus aqueste article