Bandièra01 1180x150: Comuna de Tolosa

editorial

A la mercé de las màfias

| Denny Franzkowiak
Las principalas societats electricas de l’estat espanhòl faguèron voidar arunan las restancas per aver l’escampa de generar l’electricitat amb de gas e aver aital mai de profièch a l’ora de la comercializar. Aquela practica que la poiriam considerar mafiosa, es estada confirmada. Sabián pas qu’ongan la secada seriá inquietanta. Pasmens, lor manòbra foguèt de pensar unicament al profièch economic immediat e non pas a servar d’aiga per l’avenir. Aquela estrategia economica portèt un encariment escandalós de l’electricitat dins l’estat espanhòl, qu’a pas quitat de pojar.
 
Per compensar la despensa excessiva dels ciutadans, lo govèrn de l’estat —que se ditz d’esquèrra— a decidit de baissar los impòstes sus l’electricitat, e la TVA a passat del 21% al 10%. Amb aquò, las societats electricas contunhan d’amassar de beneficis impressionants e solament se baissa los impòstes, que son l’argent que se transferirà, teoricament, al pòble.
 
Del costat nòrd dels Pirenèus, lo govèrn francés, que teniá mai de l’80% de la societat electrica EDF, n’a aquerit lo 20%  que restava en la nacionalizant. EDF a un deute de milions d’èuros e de nombrosas centralas nuclearas en mantenença. Los ciutadans franceses pagan l’electricitat  a un prètz fòrça mai rasonable, mas tot comptat e rebatut, pagaràn d’un autre biais, amb lors impòstes, lo deute d’EDF. De dire qu’en 2021 EDF aguèt un profièch de gaireben 5 miliards d’èuros.
 
Lo secretari general de l’ÒNU, António Guterres, a fach una crida als govèrns del Mond entièr per que fagan pagar d’impòstes a las societats petrolièras e gasièras qu’an de “profièches excessius”, e qu’empleguen aquel argent per ajudar los mai vulnerables. Dins aquel sens a dich qu’es “immoral” qu’aquelas societats encaissen tantes sòus amb un “còst enòrme pel clima”.
 
Enfin, sèm pas solament los “extremistas” que disèm que l’umanitat se tròba a la mercé de las màfias; ara l’ÒNU o ven de confirmar!



abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Extremista ? Qu'es aquò, exactament, un extremista ? Volètz dire, qualqu'un remet en causa e en question, metodicament, lo prejutjat irracional consubstancial a tota pretenduda reflexion se volent politica, e qu'afirma sense jamai o desmotrar (plan segur) que los umans, auriam un besonh irremissible d'èsser governats per de rascladuras racistas, masclistas, supremacistas e insofribalement inegalitaristas ?

  • 3
  • 0

Escriu un comentari sus aqueste article