Bandièra01 1180x150: Comuna de Tolosa

editorial

Onze ans an passat, e la gaseta ven un quotidian

Lo 31 de març de 2012, espeliguèt Jornalet. Fasiá de temps que l’èrem a aprestar e decidiguèrem aquela data per lo far nàisser al moment de la granda manifestacion per la lenga occitana que se teniá a Tolosa. Onze ans an ja passat, e avèm la percepcion que, per fòrça mond, legir aqueste quotidian es una abitud de cada jorn o de cada setmana. Sèm contents d’aver atench aquela tòca e de portar nòstre gran de sable a la dignitat de l’occitan. En consequéncia, volèm grandmercejar los legeires, los collaboradors, los redactors, los opinants, lo corrector, lo locutor, lo dessenhaire de la vinheta e tota la còla que nos ajuda a far avançar aqueste projècte; e, solide, los anonciaires que nos ajudan a finançar, las institucions que nos donan tanben un còp de man e l’associacion dels Amics de Jornalet. Res de tot aquò seriá pas possible se manquèsse un dels elements qu’avèm mençonats.
 
Es un miracle d’arribar aicí. Totun, onze ans de trabalh sens arrèst e amb de ressorsas precàrias es fòrça alassant. Fasèm, per tant, una crida al sosten, non solament economic mas d’òbra. Un don, un escotisson als Amics de Jornalet, un contracte de publicitat son d’ajudas indispensablas per far viure Jornalet, mas tanben nos cal de braces e de plumas, d’engenh, d’idèas, de contribucions, de vendeires de publicitat, de collaboradors... Tot engatjament serà fòrça benvengut.
 
 
Nòu sit web
 
Lo nòu sit web qu’anonciàvem l’an passat es, enfin, fach. Après un periòde de provaments serà mes en linha lo 18 d’abril venent. Los legeires remarcaràn solament una melhora navigacion e una lectura mai plasenta mai que mai adaptada als telefòns mobils e a las tauletas. A mai, se metrà lo ponch final als comentaris anonims amb un sistèma de verificacion de las adreiças e-mail.
 
Enfin, lo nom del jornal serà leugièrament cambiat. A partir del 18 d’abril, amb l’inauguracion del nòu sit web, aqueste jornal que sètz a legir se nomenarà “Jornalet, quotidian occitan d’informacions”.
 
 
D’òbra a la disposicion del public
 
Se i a pas encara de libre d’estil concret, ja tenèm un estil pròpri: una còla de lingüistas an collaborat a bastir un modèl pròpri de lenga per aqueste jornal, qu’a desvolopat un còrpus enòrme que metèm a la disposicion de totas las entitats que lo demandarián. Lo podèm fornir, se cal, cada jorn mes a jorn. Es tanben a la disposicion de totes lo trabalh menat a bon tèrme d’apròchi de las encontradas tradicionalas d’Occitània.
 
Los àudios que cada jorn acompanhan las informacions son cedits al Congrès Permanent de la Lenga Occitana per contribuir al desvolopament del sintetizador vocal votz.eu.

 
 
 
fffff fffff
 Cossí ajudar Jornalet
 
Far un don a l’ADÒC (associacion de drech catalan)via PayPal
 
Venir sòci dels Amics de Jornalet (associacion de drech francés)
 
De publicitat sus Jornalet
 
Librariá en linha
 
Contactar la redaccion
 
   

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Zep Armentano País Invisible
18.

Se sèm pas mès, que siguem pas mèns!

  • 0
  • 2
Andriu
17.

Coma totjorn, es interessant de legir los comentaris quals que sián.
m'agradan mai que tot los que dison : "I a ka…", "Faucon…"
a mens que los suggestionistas sián de collaborators frustats de poder pas parlar de tot estent que las jornadas an pas que 24 oras…

  • 2
  • 3
Andriu
16.

Coma totjorn, es interessant de legir los comentaris quals que sián.
m'agradan mai que tot los que dison : "I a ka…", "Faucon…"
a mens que los suggestionistas sián de collaborators frustats de poder pas parlar de tot estent que las jornadas an pas que 24 oras…

  • 2
  • 1
Gerard Joan Barceló Pèiralata
15.

#10 Avèm pas abandonat l'idèa de publicar un libre d'estil mas per o poder far cal a l'encòp de temps e d'argent perque es un trabalh enòrme. Se creis lo finançament de Jornalet, i arribarem.

  • 7
  • 5
Manel Barcelona
14.

I a pas libre d'estil mas i a estil pròpri? Aqueste estil pòt pas aver forma de libre? En tot cas d'ans fa que desiri aver lo libre. En mai d'o metre a disposición de las d'entitats que lo demandarián, lo podètz pas metre en linha a disposicion dels lectors?

  • 5
  • 1

Escriu un comentari sus aqueste article