Bandièra01 1180x150: Comuna de Tolosa

entrevista

"La lenga occitana hèi partida dau patrimòni e fau que sia presa en compte dens lo projècte de Parc naturau regionau deu Medòc"

President de Medòc d'Òc

Ostau daus doanèirs
Ostau daus doanèirs

I a una sitacion paradòxau en Medòc: la lenga occitana es pas mei de vrai parlada mès, dens lo medis temps, i a hòrt de causas que se passan Lo projècte de Parc dau Medòc, sarà l’escadença de contactar, d’invitar e de sensibilizar hòrt d’elegits dau Medòc Un aute projècte important es de menar un trabalh sus la toponimia e la sinhalizacion bilingüa L’exposicion caminaire das Archius departementaus "La Gironda occitana" va estar l’escadença de sensibilizar los medoquins a l’occitanitat dau Medòc


Lo 5 de mai se teniá a Cuçac (Medoc) l'amassada generala de creacion de l'associacion Medòc d'Òc. Lo president elegit, Patric Lavaud, respondèt las nòstras questions.


Pòdes nos presentar l'associacion?

L’associacion "Medòc d’Òc" que ven de se crear a Cuçac a per objectius "la promocion de la lenga e de la cultura occitanas dens lo Medòc". Lo sieti sociau es a la mairetat de Cuçac Fòrt Medòc. L’Amassada de constitucion a permetut l’eleccion d’un burèu provisòri compausat de Patric Lavaud, president; d’Emilia Claverie, secretària, e Regina Ardilley, dinerèira. Aqueth burèu provisòri va se cargar de totas las demarchas administratius, com la declaracion a la sosprefectura de l’Esparra o la dubertura d’un compte bancari. Pensam organizar una auta amassada generau de cap au mes d’octobre.


Qual es la situacion de Medoc per rapòrt a l'occitan?

I a una sitacion paradòxau en Medòc: la lenga occitana es pas mei de vrai parlada mès, dens lo medis temps, i a hòrt de causas que se passan: collectages, recercas e publicacions de libres ; talhèirs d’escritura a Vendaís; cors per adultas a Vendaís, L’Esparra, Cussac, Sent Aubin, Blancafòrt, ; cors au licèu de Paulhac; dubertura de la permèira classa bilingüa de Gironda a Cussac, etc.

De la Punta de Gravas dinc a Eisinas, lo Medòc es un territòri hòrt estendut e pareissèva hòrt important d’aver una associacion "panmedoquina" per coordonar totas aqueras accions.


Dens aquel parçan, Medòc d'Oc aurà plan de trabalh e un ròtle important a jogar?

L’auta causa importanta en Medòc aquò’s lo projècte de creacion d’un Parc naturau regionau. La lenga occitana hèi partida dau patrimòni et de l’identitat medoquina e aquera novèra associacion va sajar d’estar l’interlocutor occitan das poders publics per que sia près en compte la lenga occitana dens lo Parc.


Per 2012 pòs presentar las accions de l'associacion?

Après l’estiu, vam sajar d’organizar un desbat emb elegits dau Medòc mès tanben emb d’auts, com lo David Grosclaude, conseilhèir regionau d’Aquitània, cargat de la lenga occitana, sus la presa en compte de l’occitan dens lo projècte de Parc dau Medòc. Sarà l’escadença de contactar, d’invitar e de sensibilizar hòrt d’elegits dau Medòc: la deputata e tanben los maires, conselhèirs generaus, etc. Pòt i aver tanben lo projècte d’organizar un desbat mei generau sus la presa en compte de l’occitan dens los Parcs naturaus regionaus en convidant, per exemple, elegits o administrators d’auts Parcs com lo de las Landas de Gasconha o dau Peirigòrd-Limousin. Un aute projècte important per nosauts es de menar un trabalh sus la toponimia e la sinhalizacion bilingüa. Seré pas mau d’aver atau panèus dens los vilatges en francés e en occitan.

Dens los mes que venen, l’exposicion caminaire das Archius departementaus "La Gironda occitana" va estar presentada en agost a Vendaís e en setembre a l’Abbadia de Vertulh. Va estar l’escadença de har coneisher las particularitats occitanas de la Gironda e de sensibilizar los medoquins a l’occitanitat dau Medòc.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
4.

#3 En Peiregòrd, qu'es escrich dins l'estatut dau Parc me sembla, e fan un festenau tots los ans : tamborinaire.

http://www.parc-naturel-perigord-limousin.fr/culture_et_patrimoine/terre_de_troubadours

  • 2
  • 0
Julien St Miquèu de Riufred
3.

Lo PNR de las Lanas gasconas ajudèt a la parucion de las òbras d'Arnaudin. Lo de Miuvachas ajudèt (me sembla) a una parucion de l'IEO Lemosin (Memòrias de l'aiga, hòrt bon obratge de comandar a Limòtges a la libreria occitana). Diu aver d'autas petitas accions d'en pertot, fau cavar... Mes evidentament, l'accion se diu pas limitar a una parucion per decenia !

  • 2
  • 0
garric
2.

Tot parièr en Liuradés :

http://fontdub.o2switch.net/spip.php?article157

  • 2
  • 0
Matieu Castel Amians
1.

L'Occitan es tanben pres en còmpte dins au mens dos pargues regionaus, Lengadòc-Naut e Peiregòrd. Seria bessai interessant de metre en plaça d'aisinas comunas pertocant l'emplec de la lenga.

  • 5
  • 0

Escriu un comentari sus aqueste article