Les (Val d'Aran) que hestège aguesta setmana que ven era sua hèsta major, dont cau remercar era crema deth Haro. Eth Haro, nomentat Taro en Arties, ei un tronc d’auet quilhat que serà cremat dimars de ser en escadença dera net de Sant Joan. En Les, pendent tot er an que se debanen hèstes populares ar entorn de tot eth procès tà premanir eth Haro: era davalada, era shasclada e era quilhada. Totun, era cremada que se harà anet ei eth moment mès especiau. Dempús dera benediccion deth brandon, e de cantar “aqueres montanhes que tan nautes son”, que s’aluque eth Haro. Ath sòn torn que i baren es halhèrs en tot hèr virar halhes alucades de pèth de ceridèr. Dempús se dance ath torn deth brandon enquia qu’ei completaments cremat. Es dançaires, damb es vestits tradicionaus, que baren rondèus, borrègues, corrandes, gigues e d’autes dances deth país.

Vesitatz era pagina Facebook der Ajuntament de Les e seguitz en linha ua des hèstes populares mès emblematiques d'Occitània.