La cauma del CFPO de Tolosa que dura dempuèi un pauc mai d’un mes, coma la de 2013 al collègi calandreta de Montpelhièr, afortís nòstre sentiment d’un problèma bèl dins lo mitan occitan, que balha pas enveja d’aprochar d’unas estructuras occitanas e tot çò que fa viure la lenga en general.
 
Lo monde del trabalh francés ultra-liberalista que mena a la precaritat tòca tanben los emplecs dins l’occitan. Fòrça estructuras e personas an de complesença amb lo model actual de precarizacion e l’utilizan sens vergonha: foisonament de contractes ajudats, CDD, contractes precaris, servicis civics que remplaçan d’emplecs, balhar una subre-carga de trabalh, autoritarisme, despotisme, mespretz dels emplegats, menar al burn-out, salaris poirits, oras suplementàrias non-pagadas, etc. Lo militantisme deu pas justificar, caucionar, ni autorizar las marridas condicions de trabalh. Un salariat es un salariat, pas un militant. Lo que trabalha a de dreits. Voler defendre la lenga es una causida personala.
 
Lo mitan occitan es pas defòra de la societat; rescontra de problèmas de racisme, de sexisme, de nacionalisme, de moralisme, d’isolament, de validisme, de paternalisme. I cal demorar vigilants e combatre las discriminacions, aquò tanben dins lo monde del trabalh. Sèm per tornar metre en causa lo sistèma actual. Es per aquò que seguissèm pas las revendicacions pauras, a costat de problèmas màgers e que son pas prioritàrias (vòl pas dire que sèm contra), per exemple “volem mai d’occitan a la television nacionala”, “volèm mai d’emplecs ajudats”. Sèm per un espandiment de l’occitan dins de condicions bonas: nos cal pas doblidar, jol pretèxte de salvar la lenga, las valors nòstras: equitat, dreits de cadun, libertat per totes, dubertura d’esperit, dubertura al dialòg, respècte de las personas, respècte dels trabalhadors, paratge, solidaritat, larguesa e bolegadís.
 
Vos convidam a un acamp public per abordar aqueles subjèctes, ne debatre, testimoniar, e se recampar per avançar. RDV dimècres 15 de novembre a 7h al Barricade (14 carrièra Aristide Ollivier, Montpelhièr, barri de la gara)
 

Occitans Bolegants
 
 
Podètz jónher l'eveniment sus Facebook