Nòvas


7-10-2019

Lo govèrn espanhòl considèra que lo govèrn valencian deu comunicar en espanhòl amb los govèrns balear e catalan

imatge Lo burèu de l'avocat general de l'estat espanhòl a demandat al govèrn de la Generalitat Valenciana qu'emplegue la lenga castelhana per comunicar amb las administracions de la Generalitat de Catalonha e de las illas Balearas. Aquela exigéncia seriá justificada pel fach que l'estatut d'autonomia del País Valencian ditz que la lenga pròpria es lo "valencian" mentre que los de Catalonha e las Illas Balearas utilizan lo tèrme de "catalan". Mas lo govèrn de la Generalitat Valenciana a respondut que contunharà de far servir la lenga catalana dins sas comunicacions amb las administracions del Principat de Catalonha e de las illas Balearas.
 
Joan Calabuch, lo secretari del govèrn valencian per l'Union Europèa e las relacions amb l'estat, diguèt sus TV3 que la demanda de l'avocat general de l'estat espanhòl aviá pas cap de basa juridica, e precisèt que los tres govèrns regionals avián totjorn escambiat en catalan sens traduccion car es la lenga comuna.
 
 
Segon lo burèu de l'avocat de l'estat espanhòl, la Generalitat valenciana deu comunicar en castelhan amb los govèrns catalan e balear perque ‘lo valencian es solament oficial dins la Comunautat Valenciana’, puèi que l’estatut del País Valencian fa referéncia a la lenga partejada coma ‘valencian’, del temps que dins los estatuts de Catalonha e de las illas Balearas s’utiliza lo tèrme ‘catalan’.
 
En seguida, de deputats catalans e bascos al Congrès espanhòl dels Deputats, an sollicitat la compareissença de la vicepresidenta del govèrn de l'estat, Carmen Calvo. Vòlon qu'explique perqué refusa l'unitat de la lenga catalana en s'opausant al consens social e academic.





Veire l'article sul web
© Jornalet       Version web