Bandièra01 1180x150: Comuna de Tolosa

Actualitats

Roma: secutada per aver ensajat de defendre una jove ròm assalhida dins lo mètro

La jornalista Giorgia Rombolà foguèt insultada e menaçada pels autres passatgièrs: “Puta, perqué la defendiás?”, “Es çò que meritan aquelas gossas de gitanas”

Lo mètro de Roma
Lo mètro de Roma | Juan Enrique Gilardi
La jornalista italiana Giorgia Rombolà visquèt dimècres passat un episòdi de racisme a Roma. Ela ensagèt d’arrestar un passatgièr que tabassava una femna ròm d’aperaquí 20 ans dins lo mètro de la capitala italiana, davant sa filha de tres ans. Luènh d’èsser ajudada, Rambolà foguèt insultada pels autres passatgièrs, çò rapòrta Il Corriere de la Sera.
 
La jornalista entendèt una drolleta que plorava, e se sarrèt d’ela. Aquí vegèt qu’un òme tabassava brutalament la maire, perque, segon el, aquesta auriá ensajat de li panar lo pòrtafuèlha. L’òme plaquèt al sòl la drolleta e comencèt de tustar la femna al cap. Dos gàrdias de seguretat immobilizavan la femna del temps que l’òme la prenguèt pel pel e li faguèt picar lo cap quatre còps sus la paret. Puèi, los gàrdias la menèron per la deténer, coma acusada de panatòri.
 
Giorgia Rombolà ensagèt de defendre la femna. Mas degun li ajudèt pas. Al contrari, lo mond l’insultavan. “Puta, perqué la defendiás?”, “Es çò que meritan aquelas gossas de gitanas!”, çò li disián. Quitament un passatgièr la menacèt: “Saique davalarem a la meteissa estacion... Veiràs, puta!”. Aquí Rombolà rapòrta qu’aguèt fòrça paur. “Me fondèri en plors, perque, fins ara, aquela ferocitat l’aviái solament legida; ara, per contra, m’èra arribada a ieu”, çò publiquèt sus son compte Facebook.
 
 
Secutada sus Facebook
 
Mas son messatge sul ret social venguèt una nòva buta de menaças e d’insultes racistas. Se li mandèt tantes comentaris insultants que deguèt escafar son compte de Facebook.
 
 


 
fffff fffff
 Banh de molonada de Matteo Salvini a Roma 
 
Lo ministre de l'Interior italian e cap de l'ultradrechista Liga, Matteo Salvini, recebèt aquesta dimenjada un banh de molonada sus la Plaça del Pòble a Roma. De milièrs de personas arribadas de pertot en Itàlia s'acampèron per festejar los primièrs sièis meses de Salvini al govèrn italian.
 
La majoritat dels participants, dont plusors familhas amb d'enfants, arribèron dins la capitala italiana amb los trens especials e mai de 200 autobuses meses en plaça per l'escasença.
 
   




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Res Inexplicata Volans
3.

Se la raubaira a la tira aguèsse estada napolitana de que n'auria dich Giorgia Rombolà ? Que foguèt tustada perque napolitana ? O, encara mai tendencia, perque femna ?

  • 14
  • 1
Artur Quintana Font La Codonyera (Aragon)
2.

Grand mercès per aquesta nòva. O dirai als mieus filhs e felens, pr'amor que susvèlhen ben en Italia. An de rèire-besavis roms.

  • 1
  • 0
Enfalena
1.

Es plan conegut aquel càs qu'aquestes jòves ròm, panaires e raubaires de prumièra, al portanel Carta Blava, dins los transpòrts, las pòchas, los collièrs. eca.
E coma son menors o menoras la poliça n'on pòt re far.
Plan sovent tanben fan partida de malhums, onte son oblijats (adas) de panar, mas d'aquò n'es esmogut, los potonors occitans valon pas mai que los potonors francimand : son los dos costats d'una sola man.

  • 22
  • 13

Escriu un comentari sus aqueste article