Bandièra01 1180x150: Comuna de Tolosa

Actualitats

S’es publicat lo libre de memòrias d’Edward Snowden

Se publiquèt dimècres passat dins lo Mond entièr en un vintenat de lengas dont lo catalan, lo francés e l’italian

Se publiquèt dimècres passat, dins tot lo Mond a l’encòp e en un vintenat de lengas, lo libre de memòrias d’Edward Snowden entitolat Permanent Record, en catalan Vigilància permanent (Columna Edicions), en francés  Mémoires vives (Seuil) e en italian Errore di sistema (Longanesi).
 
Qualques minutas après la mesa en venda del libre, lo govèrn dels Estats Units faguèt sa denóncia contra l’autor per aver pas permés la censura prèvia de la CIA e de l’Agéncia Nacionala de Seguretat (l’NSA segon sa sigla en anglés), d’organizacions dels servicis secrets del país ont Snowden aviá trabalhat. Amb aquela denóncia lo govèrn estatsunidenc ensaja de recobrar tot l’argent que lo generarà la publicacion del libre.
 
Quand aviá solament 29 ans (ara n’a 36), Snowden contèt als jornals The Guardian e The Washington Post que l’NSA e l’FBI avián accedit als servidors de nòu grandas entrepresas d’Internet per obténer d’informacions utilas sus de ciutadans, per l’intelligéncia e la seguretat del país. Snowden balhèt un document secret a aqueles dos jornals. Segon aquel document, l’NSA e l’FBI se son servits del programa PRISM, que comencèt de s’emplegar dins los darrièrs ans de l’administracion de George W. Bush, e que se mantenguèt amb la de Barack Obama. Snowden demòra ara en Russia per evitar que lo govèrn estatsunidenc lo perseguisca.
 
Lo libre que ven de paréisser se presenta coma una mena de biografia e una explicacion de çò que faguèt. Malgrat l’evident servici a la comunautat, e al Mond, de l’accion de Snowden, es considerat per plusors coma un traite. “Dins aquel sens, lo libre es preciós perque confirma las rasons politicas e moralas que lo menèron a prene la decision de far venir public lo material que demostrava l’intrusion del govèrn dels Estats Units dins la vida privada dels ciutadans”, çò ditz Vicent Partal a prepaus del libre.
 
 
PRISM
 
PRISM es lo programa informatic que segon Snowden s’utilizava per far d’espionatge. Sorgiguèt dels cendres del programa secret del govèrn de Bush d’òrdres de vigilància federala, que se barrèt en 2007 quand los mèdias e la Cort d’Intelligéncia Estrangièra obliguèron l’Ostal Blanc de l’anullar.
 
Alavetz, lo Congrès aprovèt doas leis per garentir l’immunitat a las entrepresas privadas que cooperèsson volontàriament amb los servicis d’intelligéncia, çò que permetèt la creacion de PRISM. Sonque dos legislators ne sabián l’existéncia, mas avián l’obligacion de gardar lo secret.
 
Dins PRISM, sembla que i participan volontàriament Microsoft, Facebook, Google, Apple, Yahoo, Skype, YouTube, AOL e PalTalk, e es estat fòrça util per seguir la Prima Aràbia e la Guèrra de Siria. De mai, lo document secret considèra que Dropbox s’i poiriá apondre lèu.
 
La tòca de PRISM es d’amassar las informacions a travèrs del transit estatsunidenc e internacional que passa pels servidors d’aquelas companhiás, jos forma de messatges electronics, de fotografias, d’archius d’àudio e de vidèo, per seguir la pista d’un objectiu interessant pels servicis secrets.
 
Los responsables de PRISM an ensajat de protegir al maxim los participants. “Un 98% de la produccion de PRISM se basa sus Microsoft, Google e Yahoo. Nos cal assegurar qu’aquelas fonts patiscan pas de damatges”, çò ditz lo document secret.
 
De foncionaris dels servicis secrets an descrich PRISM coma l’aisina mai prolifica pels rapòrts presidencials, perque se mençonèt 1477 còps arunan. De fach, “se tresmuda en lo principal supòrt de l’NSA”.
 
PRISM es l’eiretièr d’una longa istòria de cooperacion entre l’intelligéncia estatsunidenca e aperaquí un centenat d’entrepresas privadas establidas als Estats Units dins los ans 1970.
 
La majoritat de las nòu entrepresas citadas per The Washington Post an desmentit aver permés a l’intelligéncia estatsunidenca d’intrar dins lors servidors centrals.

 
 
 
SNOWDEN, Edward. Permanent Record. Metropolitan Books, 2019. 352 paginas. 30 dolars.
SNOWDEN, Edward Vigilància permanent. Columna Edicions, 2019. 448 paginas. 20.90 èuros.
SNOWDEN, Edward, Mémoires vives . Seuil, 2019 .384 paginas. 19 èuros.
SNOWDEN, Edward Errore di sistema. Longanesi, 2019. 352 paginas. 18.60 èuros.
 
 
 
 
 


 
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Un gran home que sabet fugir a Russia a tamps.

  • 3
  • 0
Pitaluga
1.

Big Brother is wtching you!
Crompar lo libre de Snowden es un biais de mostrar qu'es pas sol e qu'a lo sosten de totes los que n'an un sadol d'èsser espionats per quin que siaga.
Aurà pas mai d'efièch que totes los "PAS DE PUB" que florisson sus las b bóstias de las letras e qu’empacha pas que nos empobolan la vida amb la publicitat per d'autres mejan quand respètan lo pegasolet. Mas podèm pas far autrament que d’i téner, fòrt e mòrt. Dins l'espèrat qu’un brave rambalh los obligue a nos ausir.

  • 11
  • 0

Escriu un comentari sus aqueste article