Dins l’illa de Lèsbos se tròba lo camp de refugiats de Pikpa, que sa caracteristica mai remarcabla es qu’es completament autogerit e guidat per divèrses collectius locals de la societat civila, dont Lesvos Solidarity, que denóncia que lo sit risca lo deslotjament. Sièis ans après son lançament, l’autoritat regionala del nòrd de la mar Egèa vòl deslotjar lo sit jol pretèxt que complís pas las condicions d’igièna exigidas. Lo jornal Directa ne publica un bèl reportatge.
 
Ara s’es bandida una campanha per raportar e far resson de la situacion. Amb l’etiqueta #SafePikpa, la campanha es venguda virala suls rets socials e quitament l’ALE, lo grop parlamentari ecologista de l’Èurocambra, a manifestat son sosten a Pikpa. D’efièch, la presidenta del grop, Ska Keller, a remarcat qu’‘es pas de creire lo prètzfach que menan a bon tèrme los benevòls amb los cases mai vulnerables qu’arriban dins l’illa’, dins una letra mandada a la governora de la region del nòrd de la mar Egèa, Christina Kalogirou, e al cònsol màger de Lèsbos, Spyros Galinos.
 
Lèsbos se tròba a pauques quilomètres de Turquia e es, per tant, una de las illas grègas ont mai de refugiats son pervenguts dins las darrièras annadas. Long de 2018, lo NACNUR calcula que 14 895 personas son arribadas a Grècia per demandar asil, mentre que mai de 1400 son mòrtas negadas en Mediterranèa dins lor camin devèrs Euròpa.