Bandièra01 1180x150: Comuna de Tolosa

Actualitats

Trèva dins la guèrra comerciala entre los Estats Units e l’Union Europèa

Juncker e Trump son convenguts de trabalhar “ensems” per un comèrci sens taxas doanièras

| Reuters/Michael Kappeler
Trèva dins la guèrra comerciala entre Washington e Brussèlas. Lo president de la Comission Europèa, Jean-Claude Juncker, e lo president dels Estats Units, Donald Trump, son consents per trabalhar “ensems” a un comèrci sens taxas doanièras ni barrièras per qualques produches industrials, e per arrestar, per ara, las taxas sus las veituras europèas. O anoncièron dimècres passat Trump e Juncker dins un comunicat conjonch après una reünion a Washington. “Lo pache se basa sul fach de comprene que mentre que negociam, se cap de las doas partidas decidís pas d’arrestar las negociacions, frenam l’imposicion de nòvas tarifas e avaloram las que s’aplican sus l’acièr e l’alumini”, çò expliquèt Juncker. Segon lo comunicat, los Estats Units e l’UE son intrats dins una “nòva fasa” de lor relacion, una fasa “d’amistat pròcha” e de relacions comercialas “‘fòrtas” ont “ganhan” los dos actors. Ça que la, s’especifica pas de datas ni se concretiza de mesuras immediatas.
 
An tanben dich que trabalharàn per reduire las barrièras e aumentar lo comèrci en servicis, substàncias quimicas, produches farmaceutics e medicals e soja. Una autra mesura pachada après l’amassada es de “refortir” la cooperacion estrategica sus l’energia e de veire que l’UE impòrte mai de gas natural descalhat estatsunidenc per diversificar son provesiment. En mai d’aquò, l’acòrdi ditz tanben que los dos actors comercials obraràn “estrechament” amb lors sòcis per reformar l’Organizacion Mondiala del Comèrci e abordar de practicas comercialas desleialas, coma lo panatòri de proprietat intellectuala o las subvencions industrialas.
 
Segon las donadas que publica aquel comunicat, los Estats Units e l’Union Europèa amassa an mai d’830 milions de ciutadans, mai del 50% del PIB global e mantenon una relacion comerciala bilaterala de mai d’800 miliards d’èuros.
 
 
La guèrra comerciala, de l’acièr e l’alumini a las veituras
 
Dempuèi lo començament de junh, los Estats Units an impausat de taxas doanièras del 10% e del 25% a las importacions d’acièr e d’alumini de l’UE. Coma mesura de “reequilibri”, a la fin del mes la Comission Europèa apliquèt de nòvas tarifas del 25% a una longa lista de produches estatunidencs coma los jeans, los objèctes d’acièr, lo whisky, lo tabac, las motocicletas, los vaissèls de vela o de motor per léser e per espòrt, lo milh, lo chuc d’irange, los avajons e de produches de maquilhatge, entre d’autres.
 
Lo meteis jorn qu’intrèron en vigor las nòvas taxas doanièras, Trump menacèt l’UE amb de tarifas del 20% sus “totas las veituras” europèas. Davant l’anóncia, Brussèlas avertiguèt los Estats Units de las repercussions e respondèt tanben en menaçant de nòvas represalhas.

 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc palma
4.

Quin dos pardalets, què non son polits ?

  • 1
  • 0
Pirolet
3.

Lo Pintaire e lo Bramaire.
Aquesta faula l'avètz pas dins las faulas complètas de Joan de la Font.

  • 2
  • 0
Guilhèm Thomas Tolosa
2.

Agachi C.N.N dempuèi qualquas setmanas ara e i a fòrça causas interessantas que se passan a l'entorn de Trump a l'ora d'ara.

Soi un pauc estonat del biais amb la aquesta novèla es presentada, perque aicí Trump evidentament recuola.

Recuola sus una mesura qu'es contradictòria amb los imperatius de sas promessas economicas : tornar favorisar l'automobila americana.

O pòt pas far se torna botar una economia mondiala amb de taxas doganièras - e segurament que l'industria americana es darrèr aqueste revirament de posicion.

  • 4
  • 0
Enric Mala Tèsta
1.

Jean-Claude Juncker e Donald Trump son consents per trabalhar “ensems” a un comèrci sens taxas doanièras ni barrièras per qualques produches industrials. E consents, cossí o poirián èsser pas ? Son doás làmias ultraliberalas que nadan dins l'aiga trebola del comerci internacional amb per objectiu d'enriquir los rics en apaurissent los paures !…

  • 7
  • 0

Escriu un comentari sus aqueste article