Amb lo mes d’agost, un temps novèl se dobrís per la sason tretzista en Euròpa: segonda fasa en Superliga e Championship, mièjas finalas e finala de la Cup, torneg europèu dels U-19 en Serbia.

Los Dragons dins lo Super-8
 
L’entraïnaire catalan Mac Namara aviá causit de faire virar per la darrièra partida de la primièra fasa a Wigan. Los Dragons foguèron menats 8-6 a la pausa, puèi 20-6 mas capitèron de tornar a 20-20 abans de pèrdre dins las darrièras minutas 25-20 amb un tombat e un ensag marcats per l’adversari. Punt negatiu: lo retorn d’Anglatèrra de Gigòt e Broughton nafrats e lo carton roge que poiriá privar Edwards de la mièja finala de la Cup.
 
Dijòus, lo cap de fila Saint Helens aviá degut esperar la còrna per batre Warrington 14-12. Divendres, Hull KR va ganhar per l’onor cò d’Hull FC 20-16; Salford domina Leeds 38-22. Huddersfield pren la 5a plaça amb una victòria facia a Wakefield: 40-28. Dimenge, la darrièra partida de la primièra fasa vei la victòria de Castleford sus Widnes qu’acaba en darrièra posicion.
 
Dins lo Super-8, los Dragons reçaupràn Wigan, St Helens e Huddersfield e se desplaçaràn a Warrington, Castleford, Wakefield e Hull FC. Lo calendièr dels rescontres serà conegut aqueste dimècres 1r d’agost.
 
 
Plaça a la Cup!
 
E ara, pels Dragons, plaça a la mièja finala de la Cup aqueste dimenge 5 d’agost a l’estadi Macron de Bolton. Fàcia a eles, la terror de la sason: Saint Helens. Los catalans partisson un pauc a la conquista d’Imalaia, mas sèm segurs que seràn animats de la volontat d’anar a Wembley lo 25 d’agost per la finala.
 
Sul meteis estadi, seguirà la segonda mièja finala entre Warrington e Leeds.
 
Tolosa dins los 8 del Mitan
 
Dissabte, a Blanhac, fàcia a Dewsbury, los tolosans jogavan lor participacion als 8 del Mitan, la pola monta-davala entre Superliga e Championship. Lo primièr mièg temps foguèt complicat pels occitans (14-12 per eles a la pausa), mas dins lo segond temps, alinhèron los punts per ganhar 44-18.
 
La victòria de Londres dimenge los remanda en 3a posicion: los occitans auràn tres partidas de jogar a domicili (Hull KR, Widnes, Halifax) e 4 a l’exterior (Leeds, Salford, Toronto e Londres). La montada en Superliga es una draia plan complicada!
 
 
Carcassona en cèrca de moneda
 
Lo club istoric de l’AS Carcassona XIII viu d’oras dificilas: l’estructura es estada declarada en liquidacion judiciària a la fin del mes de junh. Un projècte s’es lèu mes en plaça per que la vila contunhe d’èsser una plaça fòrta del movement tretzista a l’entorn de doas estructuras per anar cap a una professionalizacion: una SASP (Societat Anonima Esportiva Professionala) e una associacion. Crida es faita per la crompa d’accions de la SASP e, mai generalament, per de dons a l’associacion per remosar d’aicí la fin d’agost al mens 150 000 èuros per poder anar veire de partenaris e d’institucions amb una brava sòla e téner una plaça bèla dins las competicions tre la tardor. Los tretzistas de Carcassés, d’Aude, d’Occitània, de Catalonha e de pertot son convidats a prene part a aqueste movement per que los Canaris contunhen de volar gaujosament e de se passar la palma de mans en mans.
 
 
 
 
Alan Roch
 
 
 
 

---

Carcassona: lo XIII es en cèrca de moneda per relançar una formacion fòrta