Bandièra01 1180x150: Comuna de Tolosa

Actualitats

Bangladèsh: lo reversament d’adolescents per un autobús provòca una revòlta d’estudiants

Lo govèrn prepausa la pena de mòrt contra los menaires d’accidents mortals mentre que los estudiants planhon las marridas condicions de trabalh dels conductors

| The Rob\'s
Bangladèsh es a viure una revòlta d’estudiants sens precedents. De milièrs d’estudiants protèstan dempuèi mai d’una setmana contra la manca de seguretat estradièra. La mobilizacion se produtz après qu’un autobús reversèt a granda velocitat dos adolescents. Alavetz, los estudiants manifestèron per carrièras contra aquela sòrta d’accidents, que provòcan la mòrt d’aperaquí 4000 personas cada an sus las estradas de Bangladèsh.
 
Lo menaire de l’autobús foguèt arrestat sul pic del temps que la primièra ministra del país, Sheikh Hasina, demandava als manifestants qu’arrestèsson la protèsta e rintrèsson en cò lor, car lo govèrn del país pren de mesuras per far respectar las règlas de circulacion.
 
 
Las revendicacions
 
Lo govèrn de Bangladèsh prepausa de far una lei que punisca de la pena capitala los menaires responsables d’accidents amb de victimas mortalas. A l’ora d’ara, la lei del país ne prevei un maxim de tres ans de preson.
 
Mas es pas aquela mena de mesuras que los estudiants demandan. “Nòstra revendicacion es que [los menaires d’autobús] trabalhen un maxim de dètz oras per jorn e tanben que s’elimine lo sistèma de pagament amb de comissions”, çò declara Sheikh Shafi, un estudiant que son fraire moriguèt en 2015 tanben dins un accident de l’estrada.
 
De soslinhar que los conductors an pas de salari mesadièr fixe mas que son pagats en foncion del nombre de passatgièrs, çò que vòl dire que fan de jornadas de trabalh longassas.
 
 
De violéncias
 
Las mobilizacions tròban d’afrontaments. Los estudiants denóncian que la polícia e los partisans del govèrn los atacan. “Quand èrem arribats a l’endrech, la polícia comencèt de nos atacar”, çò ditz a qualques mèdias Rahatul Ashekin, un dels estudiants que se mobiliza. “Puèi, qualques personas armadas de bastons e amb un casco sul cap son arribats de part del burèu de la Liga Awami en tot jónher l’ataca” de la polícia, çò precisa Ashekin, que conclutz que i a fòrça estudiants nafrats. La Liga Awami es lo principal partit de centresquèrra de Bangladèsh e ten lo govèrn del país dempuèi 24 ans.
 
De son costat, la polícia afirma que se defendiá de las atacas dels manifestants. Segon lo comissari adjonch de la polícia de Dhaka, Abdullah Hel Kafi, los estudiants “lançavan de pèiras e portavan de bastons”. Dins aquel sens, Hel Kafi justifica: “Lor demandèrem qu’abandonèsson l’endrech mas o faguèron pas, per tant nos calguèt utilizar aperaquí entre dètz a quinze granadas de fum”.
 
Segon un pòrtavotz de l’espital Medical College de Dhaka, unes dotze estudiants an recebut de suènhs medicals dins lo centre, mas cap d’eles i es pas estat admés.
 
 
Talhs d’Internet
 
Los manifestats tanben acusan lo govèrn de talhar Internet al país per metre fin a las protèstas. De fach, la pòrtavotz de la comission de las telecomunicacions de Bangladèsh, Jakir Hossain Khan, a explicat qu’Internet “s’es alentit a causa d’una pana tecnica”, e a negat que lo govèrn bangladeshí aja blocat lo ret.

 
 
 

 





abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Per una question de tràfic tantas porrades e bastonades? Ho compreni pas.

  • 0
  • 0
Gerard Joan Barceló Pèiralata
2.

#1 Non, "reversar" e "reversament" son pas de francismes. Per contra, ai corregit *renversament, que l'n de tròp m'aviá escapat.

  • 1
  • 0
Mèfi ! 31
1.

*renversar (francisme) => capvirar
*renversament =>? Cap-virada
+ desquilhar / desquilhada...

  • 1
  • 1

Escriu un comentari sus aqueste article