Bandièra01 1180x150: Comuna de Tolosa

Actualitats

Rugbi XIII: “I es, papà!” coma crit de guèrra

A Belgrad, en U-19,  los joves Blaus baton los angleses 26-24 e ganhan lo campionat europèu
A Belgrad, en U-19, los joves Blaus baton los angleses 26-24 e ganhan lo campionat europèu

Per la retransmission de la mièja finala de la Cup, la BBC aviá penjat un micro al malhòt del capitani dels Dragons, Remi Casty; atal, òm s’avisèt que l’enfant d’Ornasons pontuava cada ensag catalan d’un “I es, papà!”. Formula de segur occitana que L’Indépendant se despachèt de transformar en un Yes anglés!!!


Objectiu Cup pels Dragons
 
Los Dragons privilègian la finala de la Cup de jogar lo dissabte 25 d’agost a Wembley fàcia a Warrington. La locacion de plaças marcha plan e los sostens se marcan pels viatges organizats en avion, en tren e en autobuses.
 
Del costat del terren, l’entraïnaire Mac Namarà aviá decidit de faire virar l’efectiu e de daissar se pausar dotze dels participants a la mièja finala de Bolton. Aquò vòl dire que los Dragons se presentèron a Warrington amb 15 jogaires catalans e occitans e amb 3 U-19 que prenián part a lor primièra partida d’aquel nivèl.
 
Los catalans tenguèron còp una mièja orada, mas los Lops menavan 22-0 a la pausa. Dins lo segond temps, Warrington passèt sièis còps la linha per una victòria 56-6.
 
St Helens s’es pas remés de la desfaita fàcia als catalans e pèrd sus sa pelena 16-12 contra Huddersfield. Wigan ganha de gaire fàcia a Castleford: 24-22. Wakefield va ganhar cò d’Hull-FC: 31-13.
 
Dissabte, los Dragons reçaupràn Wigan a Brutus amb lo retorn de jogaires qu’èran en pausa: darrièra repeticion abans la finala!
 
 
8 del Mitan: los tolosans, valents mas batuts
 
Dins los 8 del Mitan, Londres va ganhar a Widnes 21-20. Salford s’impausa a Hull KR 28-10. A Halifax, Toronto fa part de sas pretensions malgrat la resisténcia dels locals: 14-0 per la formacion canadiana.
 
Tolosa entamenava la competicion cò dels campions de 2017 de la Superliga: Leeds. Los angleses menèron 20-4, mas los occitans tornèron a 20-16 just abans la pausa; dins lo segond temps, l’experiéncia, las acceleracions e los menaires angleses faguèron virar canturla als occitans: desfaita del TO: 48-2 .
 
Dissabte, a 8 oras del ser, lo Tolosa Olimpic reçauprà Halifax a Blanhac ; victòria necessària se los occitans vòlon jogar un ròtle de primièra dins la competicion e considerar seriosament la montada en Superliga. E coma Halifax es dins lo meteis cas…
 
 
U-19: en Serbia, los joves Blaus ganhan lo campionat europèu
 
Aqueste dissabte, a Belgrad, los U-19 franceses jogavan la finala del campionat europèu fàcia als angleses. Lo primièr temps foguèt equilibrat: 10-10 a la pausa. Los Blaus prenián l’avantatge a la represa e se mostravan eroïcs en defensa per evitar lo retorn dels angleses. Lo tustaire anglés manquèt doas transformacions e los Blaus poguèron levar lo braces de jòia: mission complida, victòria 26-24!
 
 
NRL: las legendas prenon la retirada tanben
 
En se faguent batre pels Polets de Sydney 18-14, los Lapinons daissan la primièra plaça a lor venceire del jorn. Batuda sus sa pelena per las Làmias de Cronulla 17-14, la Tempèsta de Melbourne demòra a dos punts dels dos primadièrs.
 
Aprèp Jonathan Thurston, ven a Billy Slatter d’anonciar la fin de sa carrièra esportiva un còp la sason acabada.
 
 
 
 
Alan Roch
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\\\'Alan Carcassona
7.

Precision : Tolosa a perdut 48-22.

  • 1
  • 0
L\'Alan Carcassona
6.

L'essencial es que lo Casty salude mai d'ensags catalans que d'ensags angleses !

  • 2
  • 0
Ermann
5.

Çai-jos lo vidèo ont lo jogaire crida /jɛs paˈpa/
S'aquò es d'occitan me vòli ben faire curat ;-)

https://www.dailymotion.com/video/x6rqi8a

  • 0
  • 0
Ermann
4.

Aquí d'autras mai :

https://www.youtube.com/watch?v=t3zJTbE8WZA
https://www.youtube.com/watch?v=t3zJTbE8WZA
https://www.urbandictionary.com/define.php?term=yes%20daddy

  • 0
  • 0
Ermann
3.

#2 Podètz prene totas la desviradas que vodretz per vos n'autoconvéncer, pasmens non a pas res a veire amb l'occitan... es una expression eissida de las antilhesas fòrça espandida dins la cultura reggae !

https://www.youtube.com/watch?v=fo1GkLcPUCs
https://www.youtube.com/watch?v=pKc21fcgWY4
https://dekartcom.net/sedode-brille-au-yes-papa/
http://www.mouv.fr/diffusion-yes-papa-yes-patson
https://youtu.be/qOELNUC-UHw?t=22

  • 0
  • 0

Escriu un comentari sus aqueste article