Bandièra01 1180x150: Comuna de Tolosa

Actualitats

Hakas de victòria pels tolosans e pels catalans

A la pausa de Barça-Girona (2-2), los Dragons presentan la Cup al public del Camp Nòu

A la pausa de Barça-Girona (2-2), los Dragons presentan la Cup al public del Camp Nòu
A la pausa de Barça-Girona (2-2), los Dragons presentan la Cup al public del Camp Nòu
Lo TO assuca lo Barbarós
 
A Blanhac, aqueste dissabte en fin de vèspre, lo Tolosa Olimpic recebiá la formacion de Superliga d’Hull KR amb la tòca imperativa de ganhar per gardar l’espèr de jogar lo dimenge 7 d’octòbre la partida de barratge per la montada.
 
Las causas comencèron plan mal: ensag en fòrça dels Roges, novèl ensag de 80 m sus intercepcion. 12-0 e fasiá dètz minutas que se jogava. Los angleses, mèstres del terren, ajustan un ensag transformat e un tombat per menar 19-0. E aquí, d’un còp, la partida capvira: los tolosans libèran la palma, escartan lo jòc e, mercé a tres ensages (Curran, Centrone, Robin) transformats (Kheirallah) marcats en 5 minutas, tornan a 19-18 a la pausa. Sus una penalitat de 32 mètres de Kheirallah, prenon l’avantatge 20-19. Amb un Ford que mena lo grop a la perfeccion per son jòc al pè e sas passas longas e precisas, los Blaus passan tres còps (Marguerite, Centrone, Ader) la defensa dels Barbarosses per menar 34-19. Los angleses clavan la marca (34-23), mas lo public dreit saluda la victòria occitana. Al bèl mitan dels collègas, los jogaires neozelandeses de Tolosa se lançan dins un haka gaujós e determinat.
 
Mas… Londres a batut Salford 11-8 e Toronto a ganhat contra Widnes: 20-12. Per esperar de disputar la partida per la montada, demòra una sola solucion a Tolosa: anar ganhar a Salford ont los Diables Roges son ja assegurats de jogar en Superliga l’an que ven. Mission impossibla? Una partida de jogar d’a fons per que i aja pas de regrèts (que, de tot biais, n’i aurà un sacat)… Dins l’equitat esportiva anglesa, los occitans jogaràn tre dijòus (partida retransmesa sus BeInSport-4) e Toronto (divendres) e Londres (dissabte) saupràn çò que lor i demòra de faire.
 
 
E los Dragons tornan ganhar
 
L’assegurança de demorar en Superliga l’an que ven e la finala de jogar (e de ganhar) de la Cup al programa, los Dragons se son pas investits d’a fons dins lo Super-8, amb sa formula que viu sas darrièras oras. An esperat l’avantdarrièra jornada per ganhar una partida, cò d’Hull-FC, en marcant dos ensages dins las darrièras tres minutas: 26-20. Aquò permet als catalans de passar lor adversari del jorn al classament: Hull FC es la novèla lantèrna roja.
 
Al retorn, los Dragons passèron per Barcelona ont foguèron reçauputs pel president de la Generalitat Quim Torra (”La ’haka’ dels Dragons ha fet ressonar el Pati dels Tarongers en la recepció que hem fet per celebrar la lliga guanyada. Ens han traslladat una energia que ens anirà molt bé pels pròxims mesos.”) abans de presentar la Cup a la pausa de Barça-Girona al Camp Nòu. Lo president del Barça prepausèt a Bernard Guasch de jogar l’an que ven Dragons-Wigan dins l’estadi mitic!
 
Wigan assegura sa segonda plaça amb una victòria 13-6 fàcia a Huddersfield amb lo catalan Morgan Escarré nomenat òme de la partida (un ensag e un tombat). Saint Helens ganha a Warrington: 34-14, e Castleford domina Wakefield: 42-10.
 
Demòra una jornada de jogar mas se sap ja que las mièjas finalas opausaràn St Helens e Warrington d’una part e Wigan e Castleford d’autra part.
 
 
Tardor internacionala
 
Aqueste dimenge, a Limós, una seleccion de jogaires de l’Èst e una de jogaires de l’Oèst (en foncion de la primièra licéncia) s’opausavan per designar lo XIII format de jogaires d’Elèit qu’anirà jogar contra Serbia; amb lo refòrt dels Dragons e dels tolosans (enfin, d’aqueles qu’acceptaràn de venir), lo XIII de França anirà rescontrar los angleses a Leigh, d’angleses que se prepararàn atal per la venguda dels Kiwis (tres tèstes al programa). Pels Blaus, serà una Copa d’Euròpa qualificativa per la Copa del Mond de 2021 amb las recepcions, a Carcassona, de Galas (27 d’octòbre) e d’Escòcia (10 de novembre) e un desplaçament en Irlanda (3 de novembre).
 
A Limós, l’Oèst ganhèt 40-20 mas sèm plan luènh de l’enjòc, e de l’audiéncia dels Estats d’Origina australians!
 
En femeninas tanben, l’oposicion Èst-Oèst (ganhada per l’Oèst) preparava los rescontres avenidors contra Anglatèrra e Itàlia.
 
 
Represa en Elèit 2
 
La competicion en Elèit 2 a représ amb 12 formacions. Dissabte, a Puègnautièr, lo campion 2018, lo VARL a fait onor a son trofèu: victòria sus Lion 40-20. Dimenge, Ferrals ganha lo dèrbi audenc fàcia a Vilanòva de Menerbés: 30-4. Tolon signa sa primièra aparicion en Elèit 2 amb una victòria 32-28 a l’Escura d’Albigés!
 
 
Benvenguda a Carcassona XIII
 
La represa tretzista se met en plaça a Carcassona. Lo club novèl se dirà tot simplament “Carcassona XIII” e serà dirigit per un triumvirat. La presentacion de las esquipas (dirigents e jogaires) se farà lo dimars 9 d’octòbre jol tibanèl de Domèc.
 
 
NRL: Tempèsta e Polets en finala
 
Dimenge que ven (30 de setembre), se debanarà la finala del campionat de NRL a Sydney (www.nrl.com) amb los dos primadièrs de la fasa de classament que se disputaràn lo trofèu. Divendres, Melbourne tenguèt a distància Penrith: 22-6, amb l’arrièr Billy Slatter que marca dos ensages mas que deuriá passar davant la comission de disciplina per un placatge amb l’espatla endavant. La partida foguèt mai complicada pels Polets de Trent Robinson fàcia als Lapinons: victòria 12-4 (3 ensages contra 2 penalitats).
 
 
 
 
Alan Roch
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abram Auvèrnhe
3.

Es un plaser tant grand de los veire reçaubuts au Camp Nòu de Barcelona pustòst que vès París !!

  • 2
  • 0
Mèfi ! 31
2.

Tolosan = adjectiu general # Tolosenc = abitant de Tolosa
L'usatge local sembla com'ac'...

  • 1
  • 2
Alan Roch Carcassona
1.

Los Dragons a Barcelona (Youtube):
http://www.catalansdragons.com/articles-9/173-6444-les-dragons-recus-a-barcelone/

  • 3
  • 0

Escriu un comentari sus aqueste article