Bandièra01 1180x150: Comuna de Tolosa

Actualitats

L’occitan es una de las prioritats del nòu plan de govèrn de la Generalitat de Catalonha

Una de las mesuras prioritàrias serà d’encoratjar la coneissença de la lenga nòstra en Catalonha e Aran

Se presentèt dimars passat lo plan de govèrn de la Generalitat de Catalonha. Lo president en foncions, Quim Torra, anoncièt qu’una de las mesuras prioritàrias seriá d’encoratjar la coneissença de l’occitan per mejan d’una campanha nomenada “mès aranés”; tanben es previst que se melhore las estrategias d’ensenhament e d’aprendissatge del catalan.
 
Dins lo sens de la promocion de l’occitan, es ja aviat un recensament dels collectius e associacions que trabalhan per la lenga nòstra en Catalonha e Aran.
 
 
“Fins que Carles Puigdemont torne”
 
Lo plan de govèrn, pensat per quatre ans, prevei d’aprovar e aplicar las leis socialas del Parlament de Catalonha anulladas pel Tribunal Constitucional espanhòl, e de restituir las institucions catalanas “fins que Carles Puigdemont torne èsser lo president de Catalonha e que los dirigents politics tornen de l’exili e de las presons”.
 
E mai se calga soslinhar las iniciativas anonciadas que pertòcan lo camp de la cultura e de la creacion, se presentèt tanben lo plan de govèrn sus l’educacion, la santat, los afars socials, l’aculhença de l’immigracion, lo lotjament, l’espòrt, l’emplec, las finanças, las entrepresas, l’energia, la recèrca en sciéncia e energia, lo sector primari, l’environament, las vilas, lo transpòrt public, l’administracion publica, la justícia e la seguretat.

 
 
 

 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Morret
7.

#6 1/ òc-ben, l’occitan es a las escanas.
2/ òc-ben, lo francés d’uèi se pòrta plan.
Mercé d’aver pausadas de questions facilas.

  • 2
  • 0
Alaric Tolosa d occitania centrala
6.

La lenga occitana seria morta... amb sas rasigas romanas seria tamben pas mai mescadisa dins las grandas lengas vehicularas d avuei? Al contrari lo frances qu es parlat a mitat franchimand mitat angles tots los jorns a la television o dins las entrpresas es en plena forma el?

  • 2
  • 5
Lo raiòu Cevenas
5.

#4 E ben, avètz bien d'astre d'aveire de monde, amai siágon vièlhs, que pàrlon encara una lenga naturala, espontanèia. Vos enveje. Devètz restar dinc quauque endrech retirat dals Pirenèus, dals Aups, de Limosin, de Marjarida o d'Auvèrnha.
Dinc mon caire, n'i a gaireben pas pus. Amai. Per n'atrapar quatre o cinc pro escarrabilhats, chau montar dinc las nautas Cevenas que vesínon lo Causse, la Marjarida o los Sucs (n'i a encareta dinc aqueles país montanhòus).

  • 18
  • 1
Pirolet
4.

Sempre soi estonat de veire cossí d'unes occitanistas se caran de plorinejar sus la mòrt de lor lenga puslèu que de la far viure, quitament un briconet...
Quand me pensi als vièlhs de mon villatge que parlan cada jorn : la fan petar, rebordelar, rinjar, flambar la lenga occitana, amb una conariá dicha a la minuta. Io, l'aimi mai aital ma lenga !

  • 12
  • 0
Bertrand
3.

#1 Probable, perque a cò nòstre la lenga occitana es ja mòrta sens espèr de resurreccion.

  • 18
  • 16

Escriu un comentari sus aqueste article