La rintrada es arribada a Lion amb una escòla superiora creada per Marion Maréchal-Le Pen, neboda de Marine Le Pen e felena de Jean Marie Le Pen, èx-deputada de l’extrema drecha francesa pel departament provençal de Vauclusa.
 
Aquel Institut de Sciéncias Socialas, Economicas e Politicas (ISSEP) es pensat pels “preneires de decisions” e comença l’an escolar a mens d’un an de las eleccions europèas dins un moment clau per l’ultradrecha: la tanta de Maréchal es vicecampiona de las presidencialas francesas, en Itàlia e en Ongria s’i impausa l’extrèma drecha xenofòba, e ven en Euròpa Steve Bannon, èx-cap d’estrategia de l’Ostal Blanc, qu’ajuda las campanhas electoralas de divèrses movements politics d’extrèma drecha e xenofòbs.
 
Lo comitat scientific de l’escòla lepenenca es compausat de 12 òmes, de cap de femna, e explica al jornal Politico quina es la tòca del centre d’ensenhament: “Devèm transformar un elèit desorientat que sap pauc sus l’istòria de França e de son eiretatge diplomatic”. Es per aquela rason que l’escola jonh “l’encastre d’un combat cultural”, çò declaran dins Confidencial.
 
“Siam pas una escòla de partit”, çò diguèt Maréchal a Politico, “l’ensenhament a de tendéncias conservatritz, mai çò que volèm es ofrir d’aire fresc”. La neboda de Marine apond: “Podèm èsser a l’encòp una escòla patriotica e pereu nos dobrir e escambiar d’opinions”. Un dels membres del comitat scientific es Raheem Kassam, editor de Breitbart, el fa partida de l’UKIP de Nigel Farage e es collaborador de Steve Bannon.
 
L’ISSEP ofrís un mastèr de dos ans en gestion de projèctes e sciéncias politicas amb fins a 13 oras de corses per setmana, a 5000 èuros per an, dins de matèrias coma “L’art de la desinformacion”; “Istòria e estrategia militara”; “L’islam e la civilizacion islamica: analisi d’una nòva tendéncia mondiala”; e “conservatisme als Estats Units, en China e Rússia”.
 
Es fòrça significatiu de donar un còp d’uelh als eveniments avenidors programats per l’ISSEP amb de conferéncias entitoladas “La Franca enebida. La veritat sus l’immigracion”, “La libertat d’expression”, “L’istòria de las alianças israelianas”, “Grandor e misèria del populisme”, “Se la finança pòt èsser al servici de l’òme?”
 
 
 

La rentrée de l'ISSEP approche !
Nos quatre valeurs l'Excellence, l'Ethique, l'Enracinement et l'Engagement privilégient la réussite de nos étudiants.
Inscription encore possible ici https://t.co/BHnGJukL4ypic.twitter.com/rkOzYaFK6Z

— ISSEP (@ISSEP_Lyon) 3 de setembre de 2018