Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaBearnPalés

Mobilizacions entà deféner lo trin de nueit

S'anóncian duas setmanas d’accions entà deféner lo trin de nueit la Paloma Blua. Que seràn en gara de Pau dissabte que ven a 11h30

Los collectius “Oui au train de nuit” e “Back on Track” que tornan aviar duas setmanas d’accions entà deféner la Paloma Blua, qu'ei a díser lo trin de nueit Hendaia-París
Los collectius “Oui au train de nuit” e “Back on Track” que tornan aviar duas setmanas d’accions entà deféner la Paloma Blua, qu'ei a díser lo trin de nueit Hendaia-París | L\'Humanité
Mobilizacion: los collectius Òc au Trin de Nueit e Back on Track que tornan aviar duas setmanas d’accions entà deféner la Paloma Blua, qu'ei a díser lo trin de nueit Hendaia-París. Qu’èran dejà en accion l’auta setmana a l’Alternativa de Baiona, e que van donc contunhar. Que seràn en gara de Pau dissabte 13 d’octobre a 11h30.
 
Dens lo lor darrèr comunicat, que bremban l’importància d’aqueth mòde de transpòrt, tant au nivèu territoriau com ecologic. En efèit, on desapareishen los trins de nueit qu’aumenta lo trafic aerian, mei polluent, e qui ns’estrama deus engatjaments environamentaus pres au parat de la COP 21 de París. Totun, lo 22 de seteme passat, la ministra deus transpòrts qu’ac disè qu’avèn un aviéner los trins de nueit e qu’avè anonciat 30 milions d’èuros entà renovar las darrèras duas linhas. Tanben, la region qu'a pres lo nom d'Occitània qu’ei a negociar entà mantiéner la linha París-Portbou.
 
Alavetz, se los militants deus trins de nueit que’s pòden atribuir ua partida d’aqueras victòrias, que vòlen totun contunhar. Au programa donc adara, sauvar la Paloma Blua, qui hesè París-Hendaia, mes tanben d’autas linhas transversaus. Entà clavar l’argumentari, que prenen l’exemple d’Àustria qui tornè préner l’an passat los trins de nueit alemands, jutjats tròp costós, e qui au cap d’un an sonque, ne tirè dejà profieits.
 
N’ac sabem pas enqüèra s’aquera escaduda e serà parièra en França, mes los militants eths, qu’ac creden, e que seràn donc en gara Pau dissabte a 11h30 t’ac har saber.
 
 
 
 
Ràdio País
 
 
 

Aqueste article es possible gràcias a un acòrdi de cooperacion entre Jornalet e Ràdio País.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Sembla que las linhas coma tamben la de Portbou que permeten d'anar de la frontera fins qualsevol lloc de França estassin deissadas de la man de Diéu, coma se non haguessin interés per lo govern centralista.

  • 3
  • 0
Pascau
1.

Lo trin de nueit qu'ei un deus mensh cars, qu'ei un miejan entaus praubes de poder viatjar. Qu'ei tanben practic per'mor viajtjar de nueit que permet de passar la jornada en la vila on viajtjam.
Quiò, que'u cau deféner.
Qu'utilisi la linha Parìs - La Tor de Caròl, de còps! Qu'a ua correspondéncia per Lion e qu'ei plan practic.

  • 5
  • 0

Escriu un comentari sus aqueste article