Bandièra01 1180x150: Comuna de Tolosa

Actualitats

L’Arabia Saudita reconeis que Jamal Khashuqji moriguèt dins lo consolat

Fins ara, insistissiá per dire qu’el n’èra sortit d’esperel; an pas encara precisat ont es lo còrs

| Reuters
Après aver assegurat durant 18 jorns que lo jornalista Jamal Khashuqji èra sortit de son consolat a Istambol d’esperel, ara l’Arabia Saudita reconeis que lo jornalista moriguèt sul sit diplomatic. Segon un comunicat del ministèri public saudian, que mena una enquèsta sus l’afar, Khashuqji moriguèt pendent una batèsta amb de personas que lo volián convéncer que tornèsse dins son país. Segon lo comunicat, la discussion amb Khashuqji “degenerèt” e s’acabèt “a còps de ponh”. Lo comunicat precisa pas qui participèt a la bagarra ni mai ont es lo còrs de Khashuqji.
 
A la seguida de la reconeissença de la mòrt, an detengut 18 personas presumidament restacadas al murtre. An tanben anonciat doas destitucions: la d’un important conselhièr reial e la del sosdirector dels servicis secrets, ambedós fòrça pròches del prince eiretièr.
 
Lo president dels Estats Units, Donald Trump, considèra crediblas las explicacions saudianas, e mai a assegurat qu’es encara tròp lèu per parlar de sancions contra aquel país arabi.
 
Per contra, las autoritats turcas asseguran d’aver d’enregistraments que demostrarián que Khashuqji foguèt torturat pendent doas oras e espeçat amb una ressèga pel quite president de la companhiá saudita de medecina legala qu’es un naut foncionari del Ministèri de l’Interior e un dels acompanhaires abituals del prince dins sos viatges a l’estrange. Las autoritats turcas asseguran tanben qu’an de pròvas que quinze agents del govèrn saudian se gandiguèron dins la vila per cometre lo crime. Segon las autoritats turcas, los agents se serviguèron de jets privats d’una societat restacada amb la monarquia e lo Ministèri de l’Interior saudians. Aquela meteissa nuèch, los agents saudians quitèron Turquia e aurián emportat lo còrs de la victima espeçat dins mai d’una valisa.
 

L’ÒNU met en dobte la version saudita
 
De son costat, lo secretari general de l’ÒNU, António Guterres, s’es mostrat esceptic envèrs las explicacions saudianas e demanda d’aprigondir l’enquèsta. D’efièch, a afirmat qu’es necite de menar “rapidament una enquèsta aprigondida e transparenta sus las circonstàncias de la mòrt de sénher Khashuqji e de garentir la plena responsabilitat dels autors”.
 
Pus energica es estada la raportaira de l’ÒNU sus las execucions extrajudiciàrias, Agnes Callamard, qu’a exigit que s’identifiquen “los assassins” e lo “cervèl” de l’operacion.
 

Una residéncia en Occitània
 
La monarquia saudita a de bonas relacions amb los caps de govèrn dels estats que tòcan Occitània, en particular amb l’estat espanhòl que li vend d’armas. E mai, a una residéncia a Valàuria (Vencenc), çò que faguèt polemica per s’èsser fach privatizar la plaja de la Mirandòla.
 
Fa qualques jorns, l’Arabia Saudita rompèt sas relacions diplomaticas amb Canadà a causa d’una fiulada sus Twitter de la ministra dels afars exteriors canadenca que condemnava la detencion de doas activistas dels dreches umans.

 

 

 




abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Colha de fachistas !

  • 1
  • 0

Escriu un comentari sus aqueste article