Bandièra01 1180x150: Comuna de Tolosa

Actualitats

La Cort d’Estrasborg condemna Espanha per aver pas garentit un jutjament just a Arnaldo Otegi

La Cort Europèa dels Dreches Umans conclutz que lo tribunal espanhòl que jutgèt qualques dirigents basquistas per un delicte d’apertenéncia a ÈTA contravenguèt a lors dreches fondamentals

La cort Europèa dels Dreches Umans de l’Union Europèa (CÈDU) a prononciat una senténcia contra la justícia espanhòla per aver pas garentit un jutjament just a Arnaldo Otegi. La cort d’Estrasborg conclutz que lo tribunal espanhòl que lo jutgèt per un delicte d’apertenéncia a ÈTA respectèt pas los dreches fondamentals d’Otegi, que passèt sièis ans embarrat en preson e qu’ara es condemnat a dètz ans d’inelegibilitat.
 
“Bastiguèron una acusacion falsa, nos encarcerèron, purguèrem la pena. Nos encarcerèron per aver bastit una estrategia pacifica. Uèi lor granda messorga es vesedoira. Nòstre sorire es pus larg e Espanha es presentada coma çò qu’es: un estat antidemocratic”, çò a dich Otegi sus Twitter en anglés, basco, catalan e espanhòl.
 
La senténcia, publicada ièi dimars, declara que s’es producha una violacion de l’article 6.1 de l’Acòrdi Europèu dels Dreches Umans contra Arnaldo Otegi, Jacinto García, Rafael Díez Usabiaga, Miren Zabaleta Tellería e Arkaitz Rodríguez Torre, totes condemnats dins aquel jutjament. Totes denoncièron a la CÈDU per manca d’imparcialitat la jutgessa presidenta del tribunal que los condemnèt.
 
Es pas lo primièr còp que la CÈDU condemna Espanha per aver contravengut al drech d’un jutjament just. En junh de 2017, la cort alsaciana condemnèt l’estat espanhòl per aver declarat inelegible l’èx-president del parlament basco Juan María Atutxa en 2003. Aqueste aviá alara refusat de dissòlver lo grop parlamentari de l’esquerra basquista, que l’estat espanhòl aviá declarat illegal. Lo tribunal d’Estrasborg donèt rason a Atutxa e als dos membres de son burèu, Kontxi Bilbao e Gorka Knörr.
  

Sièis ans e mièg en preson per aver creat un espaci politic
 
Embarrat en preson sièis ans e mièg per aver volgut crear un espaci politic ont i aguèsse pas de plaça per la violéncia, lo cap independentista basco foguèt acusat d’aver ensajat de rebastir lo partit illegalizat Batasuna. Cal dire que Batasuna foguèt jamai illegal en Euskadi Nòrd, e i tenguèt normalament son activitat fins a la data de sa dissolucion, anonciada a Baiona lo 3 de març de 2013.
 
Otegi sortiguèt de la preson lo 1r de març de 2016, e l’estat espanhòl l’invalidèt politicament fins en 2021. Ça que la, Otegi demandèt l’opinion de la Cort Europèa dels Dreches Umans.
 
 
L’enjòc politic
 
L’enjòc politic que lo pòt aver lo Bascoat amb Otegi pòt èsser grand pr’amor que fòrça analistas avián afirmat que, s’el podiá participar politicament a qualques eleccions de la Comunautat Autonòma Basca, podriá venir, plan probable, lo nòu Lehendakari o president, çò que causariá un problèma de mai per l’estat espanhòl, qu’ara ja n’a un de grand amb Catalonha e lo sieu procès independentista. Es ben probable qu’Otegi n’entamenariá un autre en Bascoat.
 
Dins aquel sens, VilaWeb publiquèt un article d’Alexandre Solano e Seda Hakobyan que compara Otegi amb d’autres presonièrs politics que son venguts presidents de lors païses o qu’an obtengut de cargas politicas importantas, coma es lo cas de José Mujica, Nelson Mandela, Dilma Rousseff o Aung San Suu Kyi.
 

Conferéncia de premsa d'Otegi a Brussèlas




abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

E la cort Europèa dels Dreches Umans de l’Union Europèa (CÈDU) non a encara prononciat una senténcia contra la justícia espanhòla per aver embarrat en preisons de ciutadans e d'elegits catalans per delicte d'opinion ?!!

#1 Es lo Rajoy e son successor que se devon manjar 15 ans per aver agut practicas de las franquistas, mespresantas dels dreits umans fondamentals…

  • 2
  • 0
francesc palma
1.

Cal que li donen una bona indemnizacion pels 15 anys que li foteren.

  • 4
  • 1

Escriu un comentari sus aqueste article