Bandièra01 1180x150: Comuna de Tolosa

Actualitats

D’oxigèn fa 3,5 miliards d’ans

Malgrat que de scientifics encara discutiscan quora se produguèt d’oxigèn sus la Tèrra pel primièr còp, ara una còla poguèt confirmar son aparicion sus la planeta 1 miliard d’ans abans

| arstechnica.com
 
Malgrat que de scientifics encara discutiscan quora se produguèt d’oxigèn sus la Tèrra pel primièr còp ( fa 2,4 miliards d’ans o mai), ara una còla poguèt confirmar son aparicion sus la planeta 1 miliard d’ans abans (o benlèu quitament abans). La tròba farà cambiar totalament l’istòria de la vida sus la Planeta Blava.
 
Çò qu’es confirmat scientificament fins ara es que de micròbis aurián produch d’oxigèn pr’amor d’un cèrt tipe de fotosintèsi (analòg al de plantas). Mas la descobèrta qu’aquò seriá arribat fòrça abans pòt cambiar lo vejaire sus l’evolucion animala e vegetala sus la Tèrra e tanben sus cossí pòt venir sus d’autras planetas.
 
Aital, e coma l’oxigèn dins l’atmosfèra de la Tèrra es totalament necessari per l’evolucion de las formas mai complèxas de vida (es de besonh per l’evolucion per poder realizar l’alenament aerobic e doncas per crear d’energia), sos nivèls cresquèron fòrça fa 2,4 miliards d’ans. De scientifics dison que foguèt pr’amor de las cianobacterias. Per d’autres encara, l’oxigèn arribèt abans.
 
Es doncas importanta la confirmacion scientifica facha per una còla de scientifics del Collègi Imperial de Londres qu’assolidan que l’oxigèn arribèt fòrça abans aquela data. Segon aquestes, la fotosintèsi de l’oxigèn se desvolopèt fa 3,5 miliards d’ans.
 
“Sabèm que las cianobacterias son plan ancianas, çò diguèt Tamai Cardona, cap d’aquel estudi, mas sabèm pas lor edat. Se fa 2,5 miliards d’ans produsián ja d’oxigèn, aquò vòl dire que la fotosintèsi de l’oxigèn auriá ja començat fa 3,5 miliards d’ans sus la Tèrra.
 
Totun, trobar quora aquelas bacterias comencèron de produire d’oxigèn sus la Tèrra es tras que malaisit. Las ròcas de la planeta del mai son ancianas, del mai son de mal trapar. E aquò entraïna un grand problèma per las trobar.
 
En luòc d’assajar de far aquò, la còla estudièt l’evolucion de las doas proteïnas que se tròban dins lo procès de la fotosintèsi per crear d’oxigèn. Dins una primièra fasa, las cianobacterias utilizan de lutz per rompre las moleculas d’aiga e far d’oxigèn (lo procès se nomena fotosintèsi II). E se fa amb doas proteïnas, D1 e D2.
 
De proteïnas de la mateissa origina
 
D1 e D2 evolucionèron, totun, desseparadament. Uèi, en de plantas e cianobacterias solament demòra un 30% d’aquel material genetic comun. De saber quora se desseparèron èra la clau. Amb d’estatisticas poguèron determinar quora se tenguèt aquò: la data foguèt de 3,5 miliards d’ans e quitament encara pus anteriora.
 
“Trapar quora evolucionèron primièr las cianobacterias èra trobar quora se produguèt pel primièr còp la fotosintèsi e doncas l’oxigèn, çò afirmèt Cardona. La geologia es d’acòrdi amb nosautres quand afirmam que las primièras tròbas d’oxigèn foguèron possiblas fa mai de 3 miliards d’ans”.
 
Malgrat aquò, l’origina de la fotosintèsi que produguèt lo primièr oxigèn e los ancessors de las cianobacterias es pas la meteissa causa. Poiriá aver un periòde de temps plan long entre ambedoás. E aquò farà cambiar, de segur, lo vejaire scientific sus quora se debanèt la creacion d’oxigèn sus nòstra planeta”. (Legissètz la seguida)





 
Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.








abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Non ven d'un milion mai o manco ! Diran lo que voldran e se quedaran tan tranquils. Escriuen per avorrir a la gent . Los que prediuen lo que no saben.

  • 0
  • 0

Escriu un comentari sus aqueste article