Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc Bas

De Nadals occitans en tèrras d’Aude

Festejar Nadal a l’occitana se pòt faire de mai d’un biais. Vaquí quaques exemples entre Cabardés e Menerbés

| Calandreta Los Cascamèls
Lo Nadal de las Calandretas
 
La calandreta Los Cascamèls organizèt sos nadalets a l’entorn del cant ièr divendres 7 e uèi, dissabte, 8 a Felinas de Menerbés amb la participacion de la Mal Coiffée lo primièr ser per una passejada als flambèls, puèi una taulejada abans los concèrts de: Belugueta, Platane, Albada, Clamenç Gautièr e lo parelh Guilhèm Vergèr/Laurenç Cavalièr.
 
A Carcassona, la calandreta ten un estanquet a Ciutat per la granda fèsta de Sant Nicolau aquesta dimenjada. Dins lo castèl vièlh, concèrt del grop vocal Canti-Canta dissabte (17h) abans un grand Se canta collectiu que lançarà una davalada als flambèls cap a la Vila bassa dins l’encastre del Teleton. La calandreta de Carcassona organiza tanben una vesprada nadalenca dobèrta a totes lo dimècres 19 de decembre, a 15h, dins los locals de l’anciana comuna.
 
 
La Glèisa s'i met
 
Lo vicari de l’evescat de Carcassona a enregistrat un CD de nadalets en companhiá d’un organista. Seràn interpretats dins la glèisa de Sijan (dimenge 9, 15h30), de Perinhan (dimenge 16, 15h30) e dels Carmes a Carcassona (dissabte 22, 15h30).
 
 
Lo Cercle Occitan de Narbona passa a taula
 
Lo Cercle Occitan de Narbona organiza un repais de cap d’an lo dijòus 20 de decembre al restaurant La Granja de Bisan de Menerbés, aprèp aver escotat l’espectacle Olimpi’Òc de Clamenç.
 
 
Lo retorn de las rabassas
 
Dissabte 15 de matin, del costat de Mossolens, amb lo primièr mercat de la sason, se tendrà una idèa de la recòlta d’ongan de las trufas negras. Seguiràn los mercats de Talairan en Corbièras (dissabte 22 de decembre) e de Vilanòva de Menerbés (dissabte 29 de decembre).
 
 
Temps de Nadal a Carcassona
 
 
A Carcassona, l’edicion 2018 del Temps de Nadal a l’Ostal Sirventés (79, la Trivala; prepausat pel Cercle Occitan del País de Carcassona e l’IEO Aude) vos convida a veire, escotar, tastar, parlar, cantar... del 13 al 23 de decembre:
 
— dijòus 13, 18h30: estrena de la mòstra de pinturas e dessenhs: "De maire en filha, 3 generacions" (Pauleta Deumié, Francesa Perrin, Moraya Minaudier)
 
— divendres 14, 18h30: Anna Brenon presenta lo libre Petite histoire des Cathares
 
— diluns 17, 19h: tasta vins-chocolat (sus inscripcion: +33(0)4 68 25 19 78; participacion: 10 èuros)
 
— dimècres 19, a 18h30: "Paraulas de Nadal". A caduna e cadun de contar, legir, cantar Nadal a son biais
 
— divendres 21, 18h30: Alan Roch parla del rugbi de XIII e presenta lo libre Lo XIII, aquò òc!
 
— dimenge 23, a 18h30: nadalets interpretats pel Duo Nadalenc (Sòfia de Dixmude e Aimat Brees)
 
Per passar a l’an novèl, los Reis de 2019 vos esperaràn lo divendres 4 de genièr (6 oras del vèspre), mas aquò es una autra istòria!

 
Marcelin Albèrt torna dobrir son cafè

 A Argelièrs (Menerbés), dissabte 22 de decembre, Marcelin Albèrt tornarà dobrir son cafè: passejada en cèrca de trufas negras a 15h, conferéncia Rugbi e Occitania per Alan Roch a 17h30, jòc Qu'es aquò? a 18h30, aperitiu a 19h00, sopar de Nadal a 20h30 amb sopa de legums, sopa a la trufa negra, castanhas, doçors e espectacle participatiu a 21h amb lançament de lantèras celèstas.

 
  
 
Alan Roch
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
1.

Es bo fer les Festes de Nadal, tal com s'han fet sempre, i sense donar-nos conte dins d'una total normalitat, per tant, Occitanes i Catalanes, tal com ha d'esser, i així dir a tota la gent que s'hi oposa, que això es el País, i que si no els agrada que hi fan aquí?
Que visca el Nadal i Occitània i Catalunya lliures!
Visca la Terra...Lliure!
L'Ernest, "El Tàrrega".

  • 1
  • 0

Escriu un comentari sus aqueste article