La Cort de Cassacion anullèt dimècres passat la condemnacion de Cédric Herrou e d’un autre militant de la Val de Ròia, condemnats en apelacion per aver portat assisténcia a de migrants, çò rapòrta La Provence.
 
Lo pus naut tribunal de la republica francesa faguèt referéncia al principi de “fraternitat” dins la lei e remandèt los dos ciutadans roiasques condemnats a Ais de Provença davant la cort de Lion per que foguèsson jutjats tornarmai.
 
Segon lor avocat, Patrice Spinosi, “es una granda victòria”. Atal Spinosi saludèt la reconeissença d’una “excepcion umanitària que deu conduire a la relaxa” dels dos òmes.
 
 
Condemnat en apelacion a quatre meses de preson
 
Après que foguèt condemnat en primièra instància a una multa de 3000 èuros amb sosta en genièr de 2017, la justícia condemnèt Cedric Herrou a 4 meses de preson amb sosta, per aver portat socors a de migrants e refugiats, com tantes autres roiasques de l’associacion Ròia Ciutadana.
 
L’8 d’agost de 2017 la Cort d’Apelacion d’Ais de Provença diguèt a Herrou sa senténcia. La justícia reconeguèt l’agricultor solidari colpable d’”ajuda a l’immigracion clandestina”. En intrant dins la sala, Herrou aviá proclamat qu’”es lo ròtle d’un ciutadan en democracia d’agir quand i a un defalhiment de l’estat”.


 
 
La solidaritat dels roiasques
 
En agost de 2015, l’estat francés decidiguèt de barrar la frontièra a Ventemilha pels migrants e refugiats. A partir d’aquel moment, la Val de Ròia venguèt lo nòu ponch de passatge, ont es frequent de trobar de desenas de migrants a se pèrdre sus las estradas e los camins de montanha. Espontanèament, d’abitants roiasques lor venon ajudar. Son organizats al sen de l’associacion Ròia Ciutadana, e refusan d’abandonar los migrants, sovent afamats e perduts.
 
Demest aqueles roiasques solidaris se tròba Cédric Herrou, un agricultor de 37 ans d’origina niçarda, qu’es conegut per aver albergat en cò sieu plusors centenats de migrants. Es ja estat detengut cinc còps en gàrdia a vista e jutjat per aver portat socors a de migrants e refugiats. Mentretant, Herrou e l’associacion Ròia Ciutadana demandan “la legalitat per portar assisténcia”.
 
 
De reconduchas illegalas de menors isolats a la frontièra
 
La cinquena detencion de Cédric Herrou arribava lo 6 de julhet passat, just l’endeman d’aver publicat sus Internet un vidèo de gaireben 12 minutas que denonciava de practicas illegalas de las autoritats francesas amb los immigrants refugiats menors. Lo vidèo, entitolat Anar-Retorn, es estat fach amb camèra amagada per la còla de Ròia Solidària a la gara mentonasca de Garavan, e mòstra e denóncia de “reconduchas illegalas de menors isolats a la frontièra” ansin coma un “centre de retencion illegal” al primièr estatge de la petita estacion ferroviària de Menton.
 

 
 
Canas metèt lo tapís roge per Herrou
 
Après la persecucion, las detencions e las gàrdias a vista, Canas a espandiguèt lo tapís roge per Cédric Herrou. Se presentèt al festenal de cinèma, fòra competicion, lo filme documentari de Michel Toesca sul prètzfach umanitari de Cédric Herrou. Entitolat Libre (Liure), lo documentari explica lo prètzfach d’aqueles ciutadans roiasques qu’ajudan als migrants.
 
Produch per Jean-Marie Gigon e per SaNoSi Produccions, lo documentari s’es menat a bon tèrme gràcias al sosten d’Emaús França, de Mètges del Mond, de Res Publica, de Ròia Ciutadana e de KissKissBankBank, e se presentèt a Canas en session especiala.