Bandièra01 1180x150: Comuna de Tolosa

Actualitats

Seisena dimenjada de protèstas dels Gilets Jaunes

Segon Paul Nafilyan, pòrtavotz de Raices d’Avenidor, “cal pas creire que lo movement se desalene”

| Cathy Viatour
La seisena dimenjada de protèstas del movement dels Gilets Jaunes s’es tenguda amb un pauc mens de vam que la setmana passada, segon qualques mèdias. Pasmens de milièrs de manifestants an protagonizat lo seisen acte en Occitània, especialament a Marselha, Tolosa e Bordèu ont la polícia a reprimit los manifestants amb de gases lacrimogèns, de tirs de flash-ball e de canons d’aiga. Un còp de mai, las vilas occitanas an agut mai de mobilizacions que París.
 
Tornarmai es a Tolosa que s’es constatat mai d’incidents, e se parla quitament de grops de trencaires venguts en marge dels Gilets Jaunes que justifiquèron las violéncias policièras. I a agut almens 18 interpelacions.
 
 
Dètz mòrts en sièis setmanas
 
Divendres passat, moriguèt un òme de 36 ans a Perpinhan, quand son veïcul percutiguèt un camion arrestat per las protèstas dels Gilets Jaunes. Lo menaire de camion èra a discutir amb los manifestants, que sul pic anèron al socors de l’accidentat. Mas moriguèt quinze minutas après. Es lo desen mòrt en aquelas protèstas dempuèi sièis setmanas.
 
Lo movement dels Gilets Jaunes esclatèt a causa de la pojada de las taxas suls carburants e sus las veituras. Mas aquò es pas que la partida vesidoira de l’icebèrg. Lo mond manifèstan contra las inegalitats, la davalada del budget dins los domenis de l’educacion, de las pensions e d’autres servicis socials, mentre que totas las taxas montan.
 
 
Solidaritat amb los presonièrs politics catalans
 
Precisament aquí, en Catalonha Nòrd, los Gilets Jaunes an mostrat aquesta setmana lor solidaritat amb los presonièrs politics catalans. L’acamp que barrava los passatges frontalièrs que copan Catalonha, sus l’autoestrada A9 a El Voló e sus la rota nacionala 116 a la Guingueta d’Ix, mostrèron de bandeiròlas amb la tòca de far conéisser als mèdias franceses “l’injustícia dels presonièrs politics”.
 

 
 
Vidèos
 
A Marselha:
 

 

A Tolosa:
 

 

A Bordèu:
 

 

Segon Paul Nafilyan, pòrtavotz de Raices d'Avenidor, “cal pas creire que lo movement se desalene”.
 

 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Luc Verdier Gap
47.

#46 E Provença ? Quid de Provença, moussu lo jacobinista tolosan ?

  • 2
  • 1
L.
46.

Quicòm que refusan de veire los occitanistas modèrnes encloscats dins un anti-centralisme primari es qu'una lenga es l'utís d'un Estat, es un dialecte ambe una marina e una armada. Es çò qu'explica uèi lo vam del francés dins la zònas colonizada per l'Estat francés, e forçalament la decadencia de las lengas de las nacions (encara) colonizadas (Corsega, Occitània, Bretanha...). Solide que Tolosa a perdut de son influéncia rapòrt al potentos comtat de l'Edat Mejan... E çò que los occitanistas nafrats del centralisme parisenc voldràn pas jamès admetre, es que la nòstra polida e canda lenga occitana ela tanben èra nescuda d'una situacion geopolitica pro comparabla a la que contribuèc a l'espandiment de l'identitat francesa a partir del sècle XVI : la capitada de la civilisacion trobadorenca e la promocion de çò qu'apelam uèi la lenga d'òc es pas completament l'afar del asard mès plan ajudada per una volontat politica de l'aristocracia Aquitana de l'epòca (ducat d'Aquitània e comtat de Tolosa, qui abans de s'emancipar, te'n fasia partida) dins l'espèr de ligar per la lenga d'usatge lo pòple a la classa dirigenta. E òc, los ducs d'Aquitània coma un pauc mès tard lo Comte de Tolosa e lo Rei d'Aragon avian mès o mens l'idea d'un brolhon d'un nacionalisme abans l'ora. Cada lenga es estada cristalisada per una situacion geopolitica concrèta, lo latin per'mor de l'Emperi Roman, lo francés per'mor del reiaume de França (après lo sècle XVI). Entre los dus, i a avut l'occitan (que s'apelava benlèu pas atal), qu'auria pas avut tan de vam s'èra pas ajudat a l'epoca per l'aristocracia aquitana (mecenas dels Trobadors).

E òc praubòts ! l'occitan es en plena decadencia per'mor que sèm colonisats per França ! qu'es una lapalissada d'o díser. Mès sustot... oblidètz pas que l'occitan seria uèi una lenga dinamica unicament que s'èra la lenga d'un estat... Qui sap (un pauc d'ucronia), benlèu un estat imperialista qu'impausaria la lenga d'òc als estajans de Paris o de bretanha ! après, quina seria estada la capitala d'aqueste Estat ? l'istòri mòstra que mantunas ciutats Occitanas pel passat aurian avut l'escadénça d'o devénguer se l'istòria s'èra debanada diferentament, Bordèu o Poitiers (ducat d'Aquitània), Tolosa (comtat de Tolosa), Pau o Ortès (Estat de Foish-Biarn).

Après, lo brolhon medieval de nacion Occitana es estat efaçat per França... Ne demòra encara qualquas traças, coma l'enplèc residual de la lenga d'òc... E çò qu'afirmi, un rèste mès perceptible qu'alhor de nacionalisma occitan dins una vasta zòna de qualques centenats de km autorn de Tolosa. Es benlèu qu'un asard, o puslèu una influénça recenta per rasons de la dinamica economica actuala de Tolosa, mès es una realitat tangibla... Quitament s'agrada pas los chauvins recentrats sus lors pichosns parçans, lors vilatjòts e lor forma blosa de lenga vernaculara, forçalament "la bona".

Enfin, de se far sonar "centralista tolosan" per de chauvins sectaris que botan sus un piedestal LOR pichon parçan, es l'espital que se fot de la caritat !

  • 2
  • 10
Lo ponch de vista de Sirius
45.

#39 Garri, Tolosa es ren, ren qu'una vila occitana d'importencia mejana, colonizada coma tot lo demai d'Occitania. Lo "pais" tolosan es au minim l'airau urban, au maxim lo departament de Garona Nauta e ren de mai. Quichatz coma un paure baug quand lo fasètz venir fins a leis Cevenas o Bigorra. Es autant absurd que de faire venir un ipotetic "pais marselhès " fins a Niça, Montpelhièr e Briançon ! Tornatz sus Terra, me damne ! Es pas perque Paris vos a fach creire a Tolosa-capitala-d'Occitania que fau prene au pé de la letra aqueu aganta-gobi. La ciutat mondina a pas mai de poder qu'abans e sa zona d'influencia se limita per leis tascas subalternas au departament 31. Lo recampament eteroclit de departaments franceses deis ex Midi-Pyrénées e Languedoc-Roussillon estant totjorn administrat sota l'autoritat directa de Paris. Om es ben luenh deis fantasmas de la pichona chorma (cinquanta ? setanta ? ) deis occitanistas tolosans dont siatz una perfiècha caricatura.

  • 4
  • 0
Los Montanhols Cevena, Cevena, Tabo !
44.

# 39. La Cevena en pais tolosan ?? Avetz pas vergonha ?? " Sem montanhols n'avem l'independencia, l'avem, l'avem, emai la gardarem ! " Pas mai franceses que tolosans, es-ti clar, capon de Dieu ?!

  • 7
  • 1
Antoni Thonens, rei de Patagonia (vassal de Roergue e Tolosia) Espital Espsiciatric de Tolosa
43.

#39 E lo pais tolosan s'espandis saique fins a Aragon, Lombardia, Portugal, Bavièra e Brasil...




  • 14
  • 0

Escriu un comentari sus aqueste article